精選提要
可能同雨傘運動嘅戀愛,始終都係無結果,分手收場,但至少俾我哋將終點延長,好讓我們在分手之前,締結更多紀念日。
談一場真正無悔的戀愛。
精選提要
可能同雨傘運動嘅戀愛,始終都係無結果,分手收場,但至少俾我哋將終點延長,好讓我們在分手之前,締結更多紀念日。
談一場真正無悔的戀愛。

有人問我,雨傘運動到咗今日,係咪已成散沙,一推就塌?
我答佢:「你傻咗呀?」
基本上,呢家你打傷我哋一個人,會有一百個人企返出嚟。
你有人嗌撤退,會有一千個人行返出嚟。
你強行清場,會有一萬個人衝返出嚟。

對方用咩手段,軟又好硬又好,都只有一個下場,就係引發一班市民到佔領區域支援。
呢個就係我哋「雨傘運動」嘅精髓。

所以,你一郁,我哋就郁;你唔郁,我哋繼續佔,直到政府肯回應我哋。
有時喺公司又好,喺屋企又好,聽到現場告急,都會心急如焚,想秒速衝去幫拖。我都有問過自己點解會有呢股衝勁。

或者,我哋同呢場「雨傘運動」,喺不知不覺之間,已經產生咗一種感情。
你就當我哋係談梗一場戀愛。愛上一場民主運動聽落去好無稽,但又似有跡可尋。

我們呢班英治下長大嘅人,都有一種民主毒癮,對「香港」兩個字有強烈歸屬感,主菜係「理想」,甜品係「自由」。近十幾年政府陰啲陰啲,71俾你行下、政總俾你坐下,望落去好理想自由,查實只係美沙酮,吊你癮。

「雨傘運動」正正係粒解藥,話俾我哋聽:「其實你哋唔一定要食屎架。」
我哋餓咗民主幾十年啦,忽然有粒解藥從天而降,都未咬碎,淨係輕輕一舔已經精神爽利!點頂呀!

即係女神一向都唔理你,今天佢唔知痴咩線,同你講:「我想試下...」
喂你都唔使諗佢想試咩,試咗先講啦!你係唔會放到手架。

所以「雨傘運動」自然地爆發。

講真,好多人差不多日日去足。金銅旺走黎走去,lunch睇新聞,放工都死要去一去金鐘,唔去會囉囉攣。

唔係有感情存在,好難會咁,有時我甚至覺得自己係同「金鐘」拍梗拖。
咁既然金鐘係我女友,鐵馬即係佢對纖纖玉手。你去拆佢,即係抽水,我梗係要阻止啦!

正正因為咁,好多老一輩永遠唔明我哋撐咁耐為咩,仲會同你講「衰仔!屋企同佔『鐘』,邊樣重要啲!」呢條問題即係「家人情人二選一」,點答呀!

坦白講,當你見過金鐘嘅大banner、poster、民主牆、旺角嘅亂戰、床位、神位,你作為一個香港人,點會唔動心呀?
對「雨傘運動」,你只會愈來愈愛,真係唔懼世事變改。

大家對民主嘅浪漫,唔係突然之間,而係一路「忍住」,死谷爛谷,突然見到有一絲曙光,我唔想咁易放手。

我好明白有啲人持相反意見,或者覺得「你佔咪佔囉,唔好影響市民嘛。」
對唔住,如果我哋嘅行動咩都唔影響,政府只會由我哋坐3、5、7年,四點交通直播都慳返。

大家都對受影響嘅市民致歉,亦希望市民們尊重大家一直嘅付出。我哋唔係咩都無付出,坐喺條街到,犧牲嘅嘢其實超乎想像,有苦自己知。

喺呢條愛情路上,我哋受過風吹雨大、吃過胡椒噴霧、頂過催淚彈、受過父母反對、通宵訓街、日日4點聽許sir講「好多謝你嘅問題呀」。 

可能同雨傘運動嘅戀愛,始終都係無結果,分手收場,但至少俾我哋將終點延長,好讓我們在分手之前,締結更多紀念日。
談一場真正無悔的戀愛。

ps. 因為唔覺得今次係「佔中」,又唔覺得係「革命」,所以用「雨傘運動」形容。

張晨("鳥"不起)原文:
https://www.facebook.com/birdnoup/photos/a.223424077745248.57108.222634147824241/688217971265854/?type=1&theater

攝:大曹

Share On
Dislike
0

發表評論