陳沖

社會民主主義傾向、喜歡文字創作。夢想成為體育評述員。希望生活愉快而穩定。

所謂光陰似箭、日月如梭,一個禮拜又好快就過,特別係歐洲各大聯賽、歐聯歐霸外圍賽開波之後,時間過得仲快!

 

作為Toon Army多年既我,從來都唔要求愛隊爭歐聯、英超冠軍,但求愛隊唔好是是但但、求求其其,甚至踢到一舊舊都收貨,除咗話搞到要降班貢大件事之外,真心講無乜要求喇……但係近年“肥佬”艾殊利入主球會,大家都睇到佢既轉會策略:賣得就賣,商業角度係成功既,好似賣走青訓卡路爾,賺幾千萬;低買高賣卡巴耶,又係商業經典。但係球會成績愈整愈差,柏祖走人之後,又死都唔肯正正經經請個領隊……今季請麥卡倫返嚟,個人覺得可以接受,期望紐卡素個名可以上返中遊位置。咁今年轉會又點呢?截止尋日嚟講,我會話愛隊係頭痛唔醫頭囉!五宗交易四宗係中前場球員,安德列治既前鋒米杜域、諾咸頓既托尼、PSV燕豪芬既韋拿當、馬賽翼鋒泰奧雲,唯一後場球員就係安德列治既梅邊巴。

 

紐卡素上季總共入咗40球,上季嚟講已經係中遊水平,之不過大部份都係上半季入…而失球數字相當恐佈,全季總共失咗63球,只係俾QPR少失10球排尾二,季尾仲創歷史既八連敗,可見紐卡素後防幾脆弱!喺上年咁慘烈既情況之下,今年真係唔改善得幾多。開鑼戰對“聖徒”修咸頓所失既兩球,同後防出錯有關;第二場對“天鵝”史雲斯,後防、中場協防既失誤就更加明顯。今個星期面對曼聯既攻擊線,人家啱啱踢完歐聯外圍賽有迪比梅開二度,我哋後場有如紙板,仲有真馬特上埸攞紅牌缺陣,今場後防真係唔知點算好喇!

 

當前法國U21歐洲冠軍主力泰奧雲加盟愛隊,本來係一件好事,之不過頭痛得咁勁,你猛揸跌打酒做乜鬼啫?頭痛藥都唔食返粒,等到佢生cancer,你真係想搞到難!有外國媒體話摩納哥既中堅艾登路亞有機會加盟,老友如果係又唔錯,只係市場上中堅價貴,曼城買華倫西亞中堅奧達文迪都要45M!何況有歐聯踢既,嚟紐卡素做咩喎!

 

http://www.espnfc.com/barclays-premier-league/23/table?season=2014

Share On
Dislike
0

發表評論