陳沖

社會民主主義傾向、喜歡文字創作。夢想成為體育評述員。希望生活愉快而穩定。

老老實實我到而家都仲興奮緊!講緊上星期次睇住紐卡素作客環境,成功喺奧脫福球場全身而退,守和曼聯0:0!麥卡倫排就排咗個似442既陣式,打起上嚟有板有眼,隊長高路仙尼可以話一洗頽風,踢出身價波。

 

冷靜落嚟去分析場波,曼聯因為喺歐聯外圍賽第一回合輕取布魯日,某程度上嚟講有輕敵成份。點知紐卡素排出血肉長城,中場縮到好後,靜待機會打反擊。所以曼聯成場波,睇落去佔上風,但實際撕唔開紐卡素既防線,形成波走兩邊底線,傳中又無高大球員去鑿波;外圍、娥眉月頂又被七甚至八個紐卡素球員塞住,想放遠程炮都唔係咁易…所以曼聯得個射字無功而還。所以我成日提:得中場得天下,真意在壓縮中場同破壞中場聯繫之中。

 

壓縮中場、改踢442,呢兩招對付兵工廠又得唔得呢?如果你要限制阿仙奴中路滲入既波,用返對曼聯嗰招,係絕對有效既。阿仙奴左右兩邊既進攻,多數由阿歷斯山齊士同艾朗藍斯兩個球員負責,而佢兩個都有一個傾向,就係由邊路帶入中間施射。如果係咁,基本上中路排出六七個球員佔中,兵工廠真係無你辦法。

 

當然你話戰術既變化,同用人哲學,一向都唔係教授雲加所擅長,不過見到個場面咁樣樣,佢可能會派近況唔錯既禾確特同張伯倫落場,用速度壓落底線,到時就要睇“銀河唯一”基奧特既表現喇。睇返紅魔嗰場,如果“大爆炸”費蘭尼出得場,紐卡素會唔會頂得順呢?基奧特特色之一,就係入高難度波、失低難度波,所謂估你唔到。季初雖然已經開齋,但係表現真係未如理想,不過頭槌始終係佢強項,制空權誰屬會係勝負關鍵。

 

紐卡素上場改用史提芬泰萊拍高路仙尼,效果明顯比拍梅邊巴好,而梅邊巴踢右路又好似唔錯,今場有真馬特復出,麥卡倫會點揀呢?老友左邊真係一個洞,希迪拉好阿美特好始終欠穩,未來如果係泰奧雲踢左翼或者左中場,佢攻強於守,左路實在係要搵個穩定發揮既球員。唉,我諗起遠在意大利既桑頓……咦,佢都係右腳踢左閘,真馬特都可以一試喎!不過,麥卡倫肯試先得㗎………

Share On
Dislike
0

發表評論