陳沖

社會民主主義傾向、喜歡文字創作。夢想成為體育評述員。希望生活愉快而穩定。

上次講開日本對運動員既重視,而縣市政府甚至出力出錢去辦免費雜誌去推廣運動。今次不如同大家分享去名古屋搵波衫既經歷。

 

今次去名古屋,其實有心買一件J-League既波衫返嚟!如果大家有買開波衫都知,大部分喺香港買到既波衫,其實都只係平民版或者叫fans版,無論造功或者一啲details位,好似球會徽章、cutting都同所謂既落場版有分別。小朋友年代,望住件紐卡素波衫原價$399家陣$199,但係著上身真係“一舊舊”仲會“吉”肉既添!唯一一件落場版,都係喺outle買德國落場版,仲要over size既。但係日本J-League係無fans版只有落場版既!所以去日本,一定要去搵搵喇!

 

不過始終名古屋無東京、大阪呢兩個超級都會咁大,市場相對細之下,賣波衫既鋪頭唔會成行成市。而且日本既鋪頭你上網搵都唔容易,你用英文搵根本係搵唔到既!最後當然係同Google translation做朋友,先搵到間叫Kamo鋪頭。

 

間鋪其實都唔算好橫街窄行,喺正松板屋隔離啫,鋪面有地面同地牢兩層,樓上賣波衫、配件、雜誌之類,地牢就賣波boots同小童、女裝波衫配件咁。入到去真係正,係唔係全世界既波衫鋪都一樣,好有興發既feel,特別係啲sales……不過人家既擺設、配搭一啲都唔馬虎,而且真係超新、超貼,歐洲大球會既波衫、練習衫一應俱全,紐卡素當時仲未返香港既作客球衣已經有售,而且佢仲有一part全部都係做組team專用區,真係你講得出既牌字都差唔多有咁滯!落完地牢睇,可能日本假日關係,好多媽媽級既女士帶住啲大小中童去搵波boots。上返樓梯先及發現,店員用手寫同埋一張一張既球員資料相,一級一級咁貼喺樓梯梯級上面,加上支持既字句,行完成條樓梯,你就會見齊成隊隊員連教練團喇!條樓梯好在唔係太長,唔係既話連茶水呀姐都要貼埋。

 

不過最後我竟然無買到J-League波衫!因為可以選擇既波衫太少喇。唔知係間鋪既問題,定係當地既球迷多數只穿fans限定tee,本身鋪頭只得一個架去sell J-League波衫,其中有一件真係好靚又啱身既浦和紅鑽作客,白色一剔既…咦,好獌喎,唔想著…三箭嗰件又得返XL…好想買件鳥棲沙岩,點知得返S…J2岐阜有龍門衫喎,仲好似係川口能活著緊既,但係真心醜樣……真係當場妖咗聲出嚟,上網睇既時候,明明有說好的大阪櫻花㗎嘛……而名古屋鯨魚真心堅唔靚,仲要無減價(謂,你想點?)最後都只係買咗件米奇老鼠crossover鯨魚既fans tee算數。

 

由於鋪頭講明唔可以影相,所以今次無圖有真相,下次我去日本,點都會買一件J-League波衫返嚟!(聽住先……)其實香港都有得賣,價錢差唔多的說,so sad……

 

http://www.sskamo.co.jp/company/store/nagoya.html

Share On
Dislike
0

發表評論