陳沖

社會民主主義傾向、喜歡文字創作。夢想成為體育評述員。希望生活愉快而穩定。

9月8號,好多香港球迷都會被香港主場緊負卡塔爾2:3呢個消息洗版,各種各樣既文章出post,有抽水既有感性既,仲有好多花邊消息,總之尋晚差唔多係night of Hong Kong!而"英雄輝"葉鴻輝就肯肯定係焦點所在。但係對紐卡素球迷嚟講,會被另一個英雄洗版,佢就係前紐卡素中場領軍人物加利史必(Gary Speed)。

 

史必,威爾斯人,司職中場中路,典型box to box中場,風格硬朗、實而不華。職業生涯由列斯聯起步,1998年由愛華頓轉投紐卡素,深得卜比sir既喜愛。史必有一項紀錄,就係自英超成立以嚟,佢能夠每一季都取得入球(截止至2007年度球季),除咗佢之外,較接近既球員,就只有曼聯家陣既助教前威爾斯國腳傑斯(Giggs),不過2013-14球季佢無入波,所以真係前不見古人,暫未有來者。

 

史必一直都好有拼勁同鬥志,就算退役之後做教練,史必都俾到大家信心。史必由國家隊隊員踢起,升上做隊長,最後更成為國家隊教練!史必既職業生涯唔算多姿多采,但係到今時今日,都仲記得佢踢波時嗰種專注。不過好多名人明星,都活喺壓力之中,有啲人可以抗壓成功,好似舒利亞射十二碼好少甩拖。但係史必就好似解決唔到心理壓力,最終選擇喺自己間屋度吊頸自殺。

 

其實佢突然自殺令人十分意外,因為家庭生活美滿,同太太生咗兩個小朋友。而事業上,史必帶領威爾斯國家隊重拾正軌,好多球迷同球評對史必寄予厚望。就喺出事前一年2010年既女皇壽辰授勳名單上,因為史必對足球既貢獻,而獲勳MBE勳章。所以大家好唔明白,史必點解要喺2011年11月28既上午,約莫七點左右,選擇吊既方式,結束佢短短42年既人生。同佢喺國家隊拍檔多年既傑斯,形容史必係足球圈既大好人,佢既好隊友、好朋友。而另一位隊友沙維治(Savage 前李斯特城中場名宿),形容史必既離開,令世上損失一個偉人。而史必出事前一日既上晝,佢哋仲碰過面……

 

9月8日係史必既生忌,好多球迷都好懷念呢位好好先生,同時亦都希望大家關注精神健康既問題。

 

http://www.bbc.com/news/uk-wales-15911321

Share On
Dislike
0

發表評論