陳沖

社會民主主義傾向、喜歡文字創作。夢想成為體育評述員。希望生活愉快而穩定。

今個星期真係紐迷“難頂able”既一個星期,先係喺星期日被屈福特技術性擊倒,之後再喺週三輸俾錫週三(唉…星期三)聯賽盃出局。

都係嗰句,老麥你真係令人莫明其妙,喺星期日既比賽,隊波被人笑“鋒無力”,製造唔到埋門既機會,點解你仲要擺個無鋒陣呢?逆向思維唔係咁㗎……睇番highlight,隊波既攻勢組織依然係一舊舊,明顯係人“太多”,分工同配合上無方向。我唔係專業教練,但係自己手上面得快翼同box to box中場,打個442點都合理過踢鬼五馬六既4231喇!場波無乜好講,85分鐘先有中龍既射門,完。

後防後段踢到無晒信心,下場對車路士,不如問定人地想邊個入、入幾多,好好咁招呼客人喇……老友,信心唔可以輸,迫和曼聯同迫到阿仙奴要出飲奶力既個道氣勢,仲喺唔喺度呢?星期六既尾場,希望…係,我仍然希望紐記唔好理咁多,務實咁踢一場贏到掌聲既比賽!

FM告訴我地,呢啲時候球會老闆唔出News就係good news,最怕佢走出嚟話支持你啫。咁,老麥帥位穩唔穩好難答你,舊年卡華8連敗都可以話自己係英超最佳,最後都係季前換人咋老友!有幻想過高普接手,佢講過唔一定教強隊嘛…莫耶斯又被傳聞到“尤魚香”,返英格蘭教中型班 I trust! 只係紐記班費中型啫……講咁多做乜,一陣打電話鬧醒老麥先!(又喺度FF…)

link:賽事精華

https://youtu.be/FYydRhhxiBU

Share On
Dislike
0

發表評論