陳沖

社會民主主義傾向、喜歡文字創作。夢想成為體育評述員。希望生活愉快而穩定。

主場對車路士,賽前有邊個估到會領先2:0到79分鐘呢?上半場紐卡素既攻防轉換同拼勁,令佢哋掌握住比賽既節奏,42分鐘艾約斯既入球,除咗要多謝蘇馬同伊雲諾域既禮讓之外,艾約斯既控球技巧同射手觸角真係一絕。

 

下半場紐記初段受壓,但係憑住法比加斯既“協助”,由韋拿杜姆輕鬆頂入,2:0!老老實實,法比加斯打防中真係毒葯,車路士實中伏…呢球明明一跟一,佢都可以走漏韋拿杜姆,仲有乜嘢好講呢?

 

不過後備入替既拉美利斯一腳冷箭世界波,79分鐘為車路士追到1:2,係成場波既轉捩點。呢球射門既角度達金球級,無嘢好講。但係紐記球員開始失去理智,多次禁區前犯規,埋下輸波伏線………

 

其實唔明老麥好地地換走米杜域,東尼仔要練都唔係今日,有佢做中鋒,先係紐記今場打得好既重點。結果東尼仔協防出事之下,由韋利安83分鐘開出罰球,美利拉斯門前遮一遮告魯爾,追成2:2平手!

 

痛失三分,真心講好唔抵!但係有幾樣嘢值得欣喜既。第一麥巴布喺希達拉受傷臨危受命之下,踢得非常好!特別佢多次封死夏薩特真係highlight之選!當然佢助攻能力不足係弱點,但係起碼解決成日被人打爆既問題。

 

第二,米杜域拍艾約斯令人期待。一月仲有排先嚟,現時人腳之下,想製造入球,唔到你唔靠呢兩個後生仔!米杜域喺中鋒位置,憑佢既身高優勢,為前線做掩護同駁腳,艾約斯呢類靈巧既前鋒真係得益不少。呢場艾約斯目標清晰,一有波踢上前場就搵位走,入到禁區就有機會,成個人生晒!而米杜域經常引到對方對中堅走出禁區,真係好幫到手,進攻有晒層次。如果拍施斯呢?唔係無得諗……可以一試!當然有米杜域之下,改踢442,無論安尼達、韋拿杜姆、高碧克同施素高都唔同晒!紐記真係唔係咁弱㗎!

 

最後就係成隊波踢出拼勁同鬥志,做球迷仲想點?掌聲俾紐卡素!!!!

 

PS.老麥,失望梗有㗎喇!希望在明天嘛!

 

#英超

#紐記

#車路士

#俾啲掌聲紐卡素

#hindsightbias

Share On
Dislike
0

發表評論