陳沖

社會民主主義傾向、喜歡文字創作。夢想成為體育評述員。希望生活愉快而穩定。

〔編按:紐卡素最後被曼城大炒6比1〕

紐記星期六晚,會作客曼城。老老實實,上次估佢俾車仔撞鬼死,點知班手足head住head到79分鐘!當然老土一句,未竟全功、功虧一簣,但係呢場和波已經嬴廿中掌聲…同成地投注飛……所以你問我點睇對藍月亮,我真係答你唔到,掌聲當然要贏,但開齋之下,三分更為重要,如果keep住個勢去曼徹斯特,會幻想既…理智啲,和波當贏,ok?反而今個星期想講紐記一個傳統,就係法式浪漫---法國左翼。由九十年代末期既真路拿、之後既羅拔,近啲既有賓艾化、卡比拿,家陣既泰奧雲,紐記對法國左翼球員真係情有獨鍾。

 

講法國左翼一定要講真路拿。用浪子嚟形容真路拿真係無錯,佢除左喺巴黎聖日耳門同熱刺之外效力三年之外,呢位浪子無一間球會會效力超過兩年,同”呂布”伊巴謙莫域有得fight。而真路拿效力紐卡素其實只有兩年時間,踢左71場波、入得區區嗰7球波,但係大家點解會咁記得佢呢?我估當時播英超或者足總盃既比賽唔多,佢效力紐卡素既時間,又正正係紐記強勢既時代,鏡頭下佢一頭長髮、喺左路不覊放縱愛自由,所以對佢真係印象難忘。事實上真路拿以波論波,係一個幾獨食、獨扭既球員,好唔好波見仁見智,有時靠佢贏波,同時亦可以因為佢既失誤而萬劫不復。法國國家隊就係因為佢死扭,94年世界盃打和都出線情況之下,被保加利亞偷甩佢個波、入埋反勝,被拒於世界盃決賽週門外。紐記96年以破紀錄收購舒利亞”回家”,球隊既重心自然落喺舒利亞身上喇!之後一年佢轉會熱刺,再之後做埋英格蘭足球先生,就係後話喇。

 

之後到左卜比sir年代,又迎來第二位法國左翼﹕羅倫羅拔。羅拔對紐卡素可謂感情深厚,佢為紐記出場129場入左30個波,效力五年期間多次表演佢既衝力射球,其中一次仲射到隊友,同為法國人既左閘班納幾乎要call白車!而呢位浪子二號,效力過九間球會,法國、英格蘭、西班牙、葡萄牙、希臘都有佢腳毛,連加拿大既多倫多FC佢都踢過!睇佢踢波好刺激,好多時都會見到佢上晒力,但係又燥到爆,好易就會扯火!其實係唔係好火先自會好波呢?真係難明……而佢有性格到喺04-05嗰季,公開同當時既領隊桑拿士開波,比賽之後憤而除衫拋落地下洩憤!離開紐記之後,佢既發展可以話差到極,每季上場20次都唔夠,年青時代被人舉為天才,職業生涯晚期鬱鬱不得志,33歲就掛靴唔踢。

 

紐記法國左翼由泰奧雲嚟繼承,但係就咁睇,佢似卡比拿重多過似賓艾化。星期六對曼城都唔知有無得出既情況之下,其實會唔會係紐記法國兵團漸漸失勢,慢慢過渡至荷蘭化既開始呢?

Share On
Dislike
0

發表評論