陳沖

社會民主主義傾向、喜歡文字創作。夢想成為體育評述員。希望生活愉快而穩定。

輸個6:1,太陽照常升起。近乎完美既上半場(我覺得喇...),到下半場失第二粒,中間體驗到心理質素既重要。曼城球星同紐記球員既分別,就在於專注同埋射門既精確度。上半場有一球右路傳中,艾約斯漏踢、米杜域無越位,就係差嗰一點點,無將紀錄改成2:0,之後既故事就注定唔一樣。相反“阿古獸”上身既阿古路,埋門觸角同刁鑽既射術,真係一次近距離既學習機會。後防問題好嚴重?老實,你搵咩人mark佢都死,狀態好到咁;二嚟心理質素唔夠穩定,第三、第四粒波真係可以唔輸,學費好貴呀!

 

不過,上半場既成功都有正面價值,起碼442雙箭頭呢個陣成為主要陣式,踢熟佢、踢順佢,我依然相信紐記係有實力既。至於領隊要唔要換人,我個人都仲係抱一個觀望態度,一嚟8場波唔係完全領隊既錯,二嚟重建需時,季中走馬上任,邊個都好難上到手,除非之後幾場都攞唔到三分、開唔到齋,否則你換人又有咩幫助呢?球隊需要一場重回正軌既勝仗!

 

好,今個星期講吓球隊另一個位置:右後衛。

 

真馬特初初嚟到紐記,正正係世界盃之後,狀態差到呢…心諗會唔會入錯貨呢?之後經歷“卡華之亂”,但係真馬特個人嚟講就愈踢愈勁,季初雖然戰績慘不忍睹,但係佢交出嚟既成績唔失禮,總算叫做有啲安慰。不過要數我最愛既右後衛,我會揀巴頓(Warren Barton)。

 

呢個禾倫巴頓唔同嗰個“殺人王”祖爾巴頓(Joey Barton),佢1995至2002期間效力紐卡素,以拼勁同勁爆體能而聞名。當時既廣東話媒體仲俾咗個花名佢,叫做“金毛獅王”,皆因巴頓當時一頭金髮、又中間分界,由三閘線狂奔對方禁區,嗰個氣勢真係唔講得笑。2012年英超廿週年,搞咗個廿年最佳陣容,十個右後衛名額佢就佔一席位!我估佢最遺憾,都應該係未能協助紐卡素贏得冠軍,一個都好吖………

 

巴頓之後既右後衛,辛頓(Davide Santon)雖好,但係打左邊多過右邊,卡爾(Stephen Carr)嚟到紐記已經殘晒,迪布治(Debuchy)只係停留一屆,真係為他人作嫁衣裳,至於賴恩泰萊(Ryan Taylor)傷多過踢……所以當真馬特交到貨,開心㗎,見佢跑上跑落又助攻又入球,好期待佢繼續為紐記踢好波!不過,佢踢完曼城嗰場之後,因為受傷又要抖一輪………傷傷吓,傷咗一隊成十個人有多,軍醫出問題定係練習太勁出事?定係黑仔到咁呢?

 

#紐迷週記

#WarrenBarton

#太陽照精升起

#右後衛

Share On
Dislike
0

發表評論