陳沖

社會民主主義傾向、喜歡文字創作。夢想成為體育評述員。希望生活愉快而穩定。

上星期既比賽日,係一個值得高興既日子,因為愛隊終於開齋鳥!

 

上半場罕有地踢得曳,係就係能夠製造三個入球,但係左右中場同時缺乏防守意識,而後防亦踢得鬆散,最終俾諾域治入到兩球。中場迪奧堤明顯缺態,十分鐘都捱唔過就領黃,漏氣、慢動作通通出齊。而呢啲缺態表現傳染左俾左後衛,久休復出既杜美特,最後半場3:2真係叫人抹汗……當然對家馬田奧臣兩球助攻都斬得唔錯,有一刻會幻想龍門係告爾會嚟會唔使輸?

 

下半場初段被人壓住嚟打,但係施素高高質素既表現喺下半場發揮關鍵作用。一對箭頭艾約斯同米杜域各有進賬,最後呢場既主角韋拿杜姆再入兩粒湊夠大四喜,老友,差啲流眼淚呢!

 

紐記呢場其實把握力超好,同對手運滯兩次中柱,好波不如好運真係金句。但係機會係留俾有預備既人,下半場改善跟波唔貼既毛病,同踢得患得患失既心態,壓縮中場等反擊,呢招果然湊效。呢個form愈踢愈順,只係傷員太多,希望人手夠捱到一月。龍門位置肯肯定要入手!

 

人情味

 

想同大家分享一下紐記既人情味。喺大勝諾域治6:2之前,其實有位得高望重既人物榮休,佢就係負責為傳媒、職球員喺比賽日預備茶水既“大家姐”卡斯迪(Kath Cassidy)。

 

聽下其他人點講。奇雲基謹話「球員可以換過,領隊可以換過,但係Kath,你係唔可以換走既!」費爵爺就話「為傳媒預備茶水絕對唔係易事,Kath你絕對配得擁有一個開心又長久既退休生活。」嘩嘩嘩,你可想而知呢個年屆88做左52年既大姐大有幾巴閉!如果紐記唔重情義,廿幾年前已經叫佢返屋企退休喇!

 

香港,你要搵呢啲故事,我諗真係唔容易。而紐記球迷仍然記得一件事,就係主場賽事17-18分鐘既致敬,係屬於艾達(John Alder)同史雲尼(Liam Sweeney)既。

 

PS.艾達同史雲尼係馬航MH17空難罹難者。兩人同為紐記忠實fans。

 

#紐迷週記

#開齋

#MH17

#人情味

Share On
Dislike
0

發表評論