陳沖

社會民主主義傾向、喜歡文字創作。夢想成為體育評述員。希望生活愉快而穩定。

老老實實,一年最少兩次既東北打比,以呢種方式結束第一回合,唔忿氣!明明上半場打得唔錯,就係唔曉入波。個感覺係,球隊仲沉浸喺大炒金絲雀場波之中,不斷意圖複製右路傳身後波會有斬獲……終於,一次五五波得身位,有球員倒下、球證吹下、十二碼判下、球員被罰紅牌:唔L係呀?

 

史提芬費查眼見迪科爾直傳,一個攝身想搶贏高路仙尼,高路雖然慢左半拍,但係鬥得之下仍然得贏費查,費查受高路既半推半撞,得輸身位應聲倒地。(我既觀察喇…)

 

坐喺電視機旁邊既我睇到既係,球證衝前指地,十二碼,再行前去高路面前,鏡頭唔知做乜移開影左第二度,可能大家都覺得,十二碼就梗係影可能射波嗰個喇…謂,搞乜呀?紅牌出場?高路同我既反應應該一樣,反而麥卡倫捉住第四旁證甸恩喺度笑……

 

其實你判十二碼球例可以支持係你既決定,但係紅牌全餐你建基於一個咩理由呢?費查當時就算唔倒地,根本佢都未必攞到個波;被你搶贏,守門員已經喺面前,最多當你半單刀,黃牌都未必要攞添!最慘係成場波,紐卡素全場犯規10次,新特蘭12次,當中有6次犯規屬於卡達莫。呢位先生多次惡意犯規,包括失球前韋拿杜姆喺新特蘭禁區轉身fake過卡達莫,卡達莫蓄意用手臂撞低韋拿杜姆,但係球證完全漠視呢個十二碼。至於判罰十二碼嗰球,球證先生個人根本都未追過中場,但就肯肯定高路犯規……最燥爆嗰球係,佢老闆,用盡食奶力向高碧克腳腕跪落去!卡達莫,人渣二號不二之選(唔好問邊個係一號,你懂的…)。但係球證一張黃牌都無俾過佢!

 

呢位球證先生叫羅拔麥特利(Robert Madley),真心有名你叫顛㗎佢(Madly)!85年出世30歲仔,第一場執法英超比賽,係喺2013年4月修咸頓對西布朗既比賽,新雞上任三把火,全場派左三張紅牌……睇嚟,佢都係一隻顛雞,同甸恩有得揮!

 

今個星期,紐記主場迎戰最近五場只敗一仗既史篤城,牌面睇好難打。史篤城啱啱打完聯賽盃,十二碼砌低車路士,前鋒保贊、阿拿杜域個個上晒力,球隊狀態慢慢上升緊;反觀紐記東北打比一戰,好似俾人打左一就重拳一樣,暈得一陣陣。加上進攻板斧單一,新特蘭一對中堅已經示範左貼身防守、封鎖傳球路線,對紐記嚟講係好有效;而且左路近乎全無攻擊性可言,屯重兵於右路,紐記就差唔多唔識攻。高碧克傷出,迪奧堤火爆,雙防中只得返安尼達俾到信心…希望紐記咬住牙喺主場,踢得好好睇睇!

 

#紐迷週記

#球證果然係Madly

Share On
Dislike
0

發表評論