陳沖

社會民主主義傾向、喜歡文字創作。夢想成為體育評述員。希望生活愉快而穩定。

留意香港足球既朋友,都知道入籍香港既非華裔球員愈嚟愈多,而且表現有目共睹。上一場作客深圳,除咗有幸運女神為港隊加油之外,非華裔球員好似基藍馬、法圖斯、高梵都踢出身價,令港隊實力高左一個層次。

 

最新消息,十月底獲得特區護照既四名外援,艾里奧、保連奴、辛祖同艾力士,都會以補選形式入選港隊名單。教練金判坤就話,今次補選係希望呢四個球員趕得切今個星期六鬥緬甸既友誼賽上陣。不過有報道話,四個人當中艾里奧已經傷左一排,仲缺操兩個星期,佢既入選引嚟非議。

 

當中“陳七”陳肇麒喺facebook出post,狀似質疑有關艾里奧入選,影響其他年青球員咁話。「班本地後生仔練咁辛苦為咩??(題已改,因為太多專家!!)」而post入面啲留言,正反各半,有人留言話支持多用本地球員,亦有人留言話有能力行先,同時亦有人不斷翻炒陳七食煙、爆房等等舊聞做人身攻擊。

 

就咁,我無意猜測陳七點諗,但係佢喺呢個時候出post,明顯係不智。你點講,都會引嚟球迷既反應,不論你有point無point,勢必引起不理性甚至係人身攻擊式對罵……陳七個page都將自己歸類到“公眾人物”,你既一言一行一定會被人用放大鏡放到最大嚟睇,所以,何必呢?

 

我個人會以能力同資格去睇入籍球員問題。如果你係國家主義支持者,基本上無嘢好講。你諗下,德國國家隊既層次比香港高太多,曾經有波蘭裔、加納裔、奧地利裔、土耳其裔、南非裔、英國裔同巴拿馬裔既球員入選國家隊。德國人係納粹既發源地,國家主義甚濃既國家,但係人家一路走來愈來愈多元化,足球圈既發展同接納難民可以話同步進行。人哋只會睇實力夠唔夠高,合唔合乎代表資格。

 

另一方面,德國既青訓成績有目共睹。西班牙+巴塞隆拿式tic-tac足球曾經稱霸全球,但係你睇到佢哋無以為繼;但係德國足球由2002世界盃之後,屆屆都入四強,2014年仲攞埋冠軍。而國家隊依然人材輩出,佢哋個勢仲keep住嚟。聯賽方面仲保持財政穩健,歐戰成績不俗,而且經常輸出高價球員添。

 

用德國做例子,係想話俾大家知,年青球員就算有出賽經驗又如何?訓練場地、訓練方式都嚟健全之下,你就算唔入歸化兵,港隊都只係不斷loop返以前loop開既嘢,我睇唔到透過一兩場國際賽既敗仗會有咩實質作用。重點在於香港球壇並非一個健康既球壇,喺呢方面就唔班門弄斧喇。

 

總結,香港青年球員如果想有突破,除咗努力訓練同爭取機會之外,向外闖都係一個選擇。歐冲去歐洲踢到落葡乙,都起碼經歷過正規足球既訓練,如果踏實啲去日職、韓職都係一個突破,上中超……就唔好喇。

 

#hongkongers

#陳七

#香港隊

 

相片來自傑志官方面書

Share On
Dislike
0

發表評論