陳沖

社會民主主義傾向、喜歡文字創作。夢想成為體育評述員。希望生活愉快而穩定。

做得紐迷,其實真係無欲無求?有時都會懷緬過去、常陶醉…紐記最強之時可以壓住曼聯嚟砌,有打過歐聯………

 

講返今日既紐記,做紐迷真係要置定平安鐘先得。星期六作客南部般尼茅夫,全場角球數字係16:0,控球指數係67:33,射門次數係20:2…老友呢堆數字都反映緊一個事實,就係紐記被般尼茅夫圍毆中!當然,仲有一個數字好重要,就係般尼茅夫20次射門,只有5次中龍,反而紐就射2中1兼入一粒。最終作客贏1:0。

 

戰況唔使多講,四個字:血肉長城。成場波面對住京治、列治、史坦尼斯拿斯射完又頭槌,高路仙尼、梅邊巴又硬頂……最重要係艾利洛多次神救,令般尼茅夫無功而還!特別係上半場大風大雨,一個唔留神就會出事,但係後備既後備艾利洛一啲都無失威,抵讚!

 

贏得肉酸,做球迷既當然唔想場場都係咁,家陣贏得一場就一場,贏完呢場,同般尼茅夫排位就即時對調,今季首次脫離榜尾三名既排位。紐記,力爭上遊呀!

 

冗員

 

紐記其實真係傷左好多人,不過除左高碧克同告爾之外,其餘好似艾朗斯、奧巴坦、麥巴布、利維拉、馬禾都唔係正選,其中奧巴坦、馬禾就講明想清走既冗員。

 

講開又講,之前大手入貨既法甲兵,除左施素高之外,其他人都好難喺麥卡倫手上爭到正選。老老實實,古法蘭、奧巴坦既踢法單一,喺柏祖年代尚有卡巴耶調度之下,仲可以呃下人;但係“卡華之亂”之後,呢批法甲兵可以話出晒事,完全幫唔到隊波。加上舊年傷足一季既施安迪莊,紐記既冗員點收科呢?

 

其實荷蘭兵勢力由告爾、安尼達開始,之加入真馬特、韋拿杜姆,正選陣容佔左四個。但係施安迪莊正步佢細佬勞克迪莊後塵,雷聲大雨點小咁回流荷蘭……一月轉會市場,會唔會再度入手呢?希望今次醒醒定定,如果再入迪莊都可以,雖然入左兩個叫迪莊既都………

 

PS.迪莊喺荷蘭係大姓,好似陳李張黃何…

 

#紐迷週記

#荷蘭幫

#有三分袋唔係唔袋

#冗員

Share On
Dislike
0

發表評論