退休保障諮詢即將開始,有消息指扶貧委員將推出一個方案,只向「有經濟需要」的長者發放約3000元。領取的資格,就係資產唔過10萬元。呢個計劃,將會同周永新教授老年金計劃以及其他計劃比較。

退保計劃會唔會「爆煲」,同埋對一個咁有錢的政府點為之「爆煲」,呢啲問題暫且唔講,今日只係想解釋高門檻資助會導致咩問題。

你會問,過10萬唔可以攞,真正有需要先要攞,唔係好合理咩? 咁要睇吓你點定義咩人係真正有需要。10萬的關口,講真好多普通市民打份工儲MPF都會超過。面對每月3000的援助,一方面會令手持兩手滙豐嘅婆仔喺大時代分分鐘誤墮法網,一方面有可能引發出大量的欺騙行為。就算人人老實,呢個政策都會扭曲儲蓄行為,減低儲蓄意欲。

當然你又會問,咁將標準訂到1000萬,都一樣會出現呢啲行為吖?冇錯,但問題係身家1000萬嘅人唔係好多個,要捉犯規嘅人容易得多,更何況有千萬身家嘅人都冇咁志在政府幾千蚊。相反,有好多人會想辦法符合10萬的標準,同時就需要有好多人去審查,行政成本好高,好難實際執行。

政府啲咩邏輯? 噚日先話資產300萬(加月入6萬)嘅單身貴族有資格攞百萬房屋補貼,今日就話得10萬資產冇收入嘅老人家冇資格每月攞3000蚊。真係好難提摸!

Share On
Dislike
0

發表評論