「高鐵」呢兩個字,對香港人來講唔係基建項目,而似係一個醫極都醫唔好嘅頑疾,耐唔耐就復發,令香港人損失一百幾十億。未見其利,先見其害,高鐵今次又有新搞作,可以六個字總結為「借錢‧派息‧封頂」。

 

原本高鐵造價650億,但愈起愈有驚喜,而家最新官方數字約840億,即係要多加成200億先可以埋單。政府自己出錢填數好樣衰,於是港鐵就想出一條橋:港鐵只有100億左右的現金,可到市場再借一筆,然後就以特別股息的方法(約4.4一股),將大約200億的股息交到大股東政府手上。即係話,好有錢的香港政府間接叫地鐵借錢起高鐵。

 

難得的,係候任港鐵主席馬時亨夠膽話「股息金額與政府申請追加的撥款金額相近,並非刻意安排」,唔係刻意安排唔通係天意安排? 天呀!天意弄人。

 

對有穩定收入的地鐵來說,此舉其實係先使未來錢,借錢換取今日多派息。同時,透過減少高鐵的一些困難部份,預期工程較順利,於是有「封頂」一說,減低了未來的風險。高鐵「縮水」減少一部分的工程,當然有損當年政府專家吹到大一大嘅高鐵經濟貢獻。對小股東來說,若果地鐵有傾向「屯積」現金,地鐵被迫派息是好事。今天股價不跌反升,似乎此舉有利小股東。

 

剩低的問題,係港鐵打算點還百億巨債?一個方法就係地鐵加價,一個就係未來減少派息。前者受損的是日日迫地鐡嘅小市民,後者講到尾就係納稅人俾錢。

 

即係話,無論點樣偷龍轉鳳,香‧港‧人‧始‧終‧要‧埋‧單。

Share On
Dislike
0

發表評論