IMF將人民幣納入SDR,金管局總裁陳德霖話,此舉令人民幣成為儲備貨幣,肯定中國開放市場同人民幣國際化的努力。佢又話,人民幣加入SDR後,外匯基金會考慮增持人民幣資產。

首先小編要澄清,加入SDR唔等如成為「儲備貨幣」。央行可以選擇用咩做儲備,而事實上依家央行儲好少人民幣。道理好簡單:因為資本管制,境外的人民幣(或有關資產)根本好少,想儲都冇得你儲。

仲有,SDR貨幣比例同央行實際儲備冇乜關係。SDR係根據IMF自己的一套計法(包括交易量),去決定果隻貨幣的重要性。至於央行,就各自選擇儲備既分 佈,考慮風險等等的好多因素。舉個例,SDR中美元佔四成,但現實中央行儲美元的比例就長期超過四成。即係話,唔係SDR改左個比例,央行就會走去跟,央行從來唔需要符合咩「國際標準」。

外匯基金要加人民幣,都面對一個問題,就係在資本管制下,每日由內地流向香港的數額有限,唔係你話加就加到,以香港巨額的外匯基金,加到一定比例仲有排等。仲有,人民幣若果堅係自由化,匯率由市場決定(又或者政府抵不住壓力,自己黎干預),咁係中國增長減慢的情況下,人民幣對美元只會逐步貶值,以港元計價的外匯基金,預左會蝕一筆。

不過咁,政治考慮,有SDR呢個大國崛起象徵性的「國際肯定」,香港點可以唔帶頭表示支持?仲有,總裁講就易,但老實講外匯基金啲資產點分佈、有咩貨幣,都唔係一般市民可以輕易查到同明白嘅嘢,講住先表示忠誠又有乜所謂呢?

Share On
Dislike
0
陳德霖     金管局     IMF     今日米路     SDR     金管局總裁

發表評論