內地11月外滙儲備按月減少872.1億美元,下降至3.43萬億美元,是自2013年2月以來的最低水平。2015年年初至今,內地外匯儲備已減少4000億美元,跌幅超過一成。

 

點解?小編會從基本因素去睇。一個國家匯率強弱,長期來講,由經濟表現決定。強國有強幣,就係咁簡單。依家內地經濟增長由保八到保七到就快保六,跌勢明顯,而出口數字亦愈來愈難睇。若果匯率自由浮動,咁匯率下跌就可以刺激出口,減低一下經濟放緩的衝擊。弊在內地有資本限制,匯率很大程度由政府操控,匯率就要靠人行決定的中間價「指導」在岸價(CNY),慢慢貶值,以免貶值太快帶來衝擊(入口貨價格急升,借美元債的企業忽然欠多咗錢)。

 

大家睇下人民幣在岸價走勢,會發現2014年先跌後升,然後又跌幾個月,去到2015年先慢慢靠穩;之後到2015年8月,突然大幅眨值,升番少少之後再貶過。呢種反反覆覆,明顯見倒人民銀行頂得非常辛苦,但都只能拖慢跌勢,而代價就係外匯儲備倒水咁倒。

 

好,咁人民幣仲有冇得跌?比較自由嘅離岸匯價(CNH)一直有指標作用,依家做緊一美元對 6.49人民幣,比在岸價6.41差一截,即係話市場相信人民幣仲有得跌,咩SDR炒高人民幣其實係吹水。人民幣未自由化,人行未來要繼續「管理」人民幣跌幅,耐唔耐要抽番匯價上嚟,內地外匯儲備相信亦有排跌。

Share On
Dislike
0
人民幣     外匯儲備     今日米路     SDR     經濟放緩

發表評論