著名朱古力品牌GODIVA昨日在其各分店舉行了軟雪糕買一送一優惠,亦即購買$45元的軟雪糕即多送一杯。此舉立刻吸引了各區市民爭相排隊搶購,部份人龍更一度長至店方宣稱要等120分鐘才能買到。結果全線GODIVA軟雪糕亦提早售罄或因機件故障而停售,引起不少買不到雪糕的市民十分不滿。

 

其實稍為計算一下,兩人享用買一送一的優惠,也不過節省了$22.5(每杯),和排隊隨時需要個多兩個小時的代價相比,明顯不符合香港這個社會的經濟成本;那為何會發生這種違反經濟學常理的事情呢?謎米經濟金融編輯部特別向幾位經濟學家請教,嘗試列出五點原因:

 

1. 傳統的經濟學答案,係排隊嘅人時間成本低,唔排都冇咩好做,加上需求彈性非常高;所以只要減價$22.5,需求量立即大增。

 

2. 羊群心理令期待價值大增,一定要呢日食,就好似睇電視劇咁,人睇你又睇,唔睇咪冇話題?排Godiva,就算排到媽媽聲,都有同朋友娓娓道來的價值。

 

3. 炫耀效果為附加價值。社交媒體的興起,同手機拍照的方便,令排隊趁墟的價值大增。在FB打卡,上載同好友買雪糕的照片,帶來的快感隨時多過慳到廿幾元。

 

4. Godiva的名牌效應,令排隊情況惡劣十倍,唔好講普通雪糕店,Haagen Dazs當日搞八達通買一送一無人排,就係因為品牌唔夠grand。平日「過Godiva門而不入」的市民,今次有機會半價試好嘢。

 

5. 正如以上所講,好多市民從來未食過Godiva雪糕,資訊被感性蒙蔽,只搞三天的買一送一遮蓋左半價只係$22.5,因為好多人都未必知道原價只係45元咁平。

 

最後,經濟學家預測,經過尋日各種資訊公開(原來排兩個鐘都可以無得食,宣傳期雪糕只有原裝一半左右),因為新鮮感減退以及網上各種嘲諷令界外價值下降,相信人龍應該會逐漸縮短;起碼唔會觸犯排兩個鐘隨時慘過拎最低工資先。

 

但又咁講,如果你男友/女友唔係經濟學家,覺得凍冰冰兩口子排成個鐘隊食雪糕都係一種浪漫嘅話,咁就無計啦!

Share On
Dislike
0
GODIVA     經濟學家     謎米經濟金融編輯部     軟雪糕     今日米路     買一送一

發表評論