特首梁振英日前將自己於經民聯晚宴中與黃家強會唱《喜歡你》的片段到個人Facebook,遭網民侵犯版權,特首辦事後稱做法不理想,稱已向CASH補辦申請,但創作人周博賢撰文,指特首仲有5個licenses未攞,呼籲「做足手續好喎」,又反建議特首:「如果唔想煩,係咪有 UGC 或 Fair Use 嘅豁免好啲呢?」

 

梁振英日前出席經民聯三週年黨慶,與黃家強等人合唱Beyond名曲《喜歡你》並將片段上載至個人facebook,被網民質疑或會違反政府現推行的「網絡23條」《2014版權(修訂)條例》。特首辦事後承認做法不理想,已向香港作曲家及作詞家協會(CASH)補回申請相關牌照。

 

創作人周博賢昨日在facebook特首辦「補飛」做法,批評未做足手績,尚欠5個licenses未有申請。周博賢指特首上載翻唱歌曲,最少涉及6個licenses。

 

唉!都唔同你計一日前知識產權署署長講咗啲乜,但係要攞正 license,又豈只同 CASH 攞?

 

梁振英 post 呢條片上網,嚴格嚟講有多種行為,要向唔同嘅人攞 licenses:

 

一)翻唱歌曲兼錄音,牽涉到詞/曲版權中嘅 reproduction right(複製權),要向詞/曲嘅版權公司(music publisher)攞 mechanical license;

 

二)將歌曲放入畫面,涉及詞/曲版權中嘅 synchronization right(影音同步權),要向詞/曲嘅版權公司(music publisher)攞 synchronization license;

 

三)因為 karaoke 用咗歌曲嘅 MMO,即牽涉 sound recording right,而 sound recording right 嘅版權持有人係歌曲所屬嘅唱片公司;將呢個 MMO 錄低,涉及該 sound recording 嘅 reproduction right(複製權),要同唱片公司攞 mechanical license;

 

四)同理,將 MMO 放入畫面涉及該 sound recording 嘅 synchronization right(影音同步權),要同唱片公司攞 synchronization license;

 

五)終於到放片上網喇,啱喇,詞/曲版權 streaming(串流)係由 CASH 負責授權,所以呢 part 你哋冇做錯到!

 

六)之但係,如上述,將歌曲 MMO 放上網,涉及 MMO 嘅 sound recording right,授權串流應該係 IFPI 或 HKRIA 負責。即係話,仲要攞埋呢個 IFPI 或 HKRIA 嘅 streaming license!!

 

Recap 一次,「翻唱 + 放片上網」隨時要攞上述六個 licenses,政府想「補鑊」?做足手續好喎!如果唔想煩,係咪有 UGC 或 Fair Use 嘅豁免好啲呢?

 

註1:我唔記得 CASH 個 streaming license 有冇包埋上面(一)嗰個 reproduction license,可能有,但頗肯定唔包(二)嗰個 synchronization license。

 

註2:如果想 share 我上面堆字,share 嘅時後要剔「include original post」,否則就淨係 share 咗條明報 link,唔見咗上面堆字。

周博賢

Share On
Dislike
0
梁振英     網絡23條     特首辦     周博賢

發表評論