會計師行羅兵咸永道預計,政府2014/2015財政年度整體收入5167億元,開支4212億元,財政盈餘955億元,比政府預期高兩倍幾(財爺最近一次的估計為368億)。同時,預期截至3月底財政儲備達8507億元,相當於政府兩年開支。

 

外匯基金權益有超過5500億,亦即香港的自由儲備(除支持港元的儲備以外,可自由使用的儲備)有14000億,以人均計世上名列前茅!

 

班高官同經濟專家,幾年前開始嚇大家香港政府儲備會用盡,更好快踏入結構性赤字。計我話,呢班人係結構性鍾意講大話,希望嚇大家唔好爭取乜嘢退保乜嘢回水,因為搞咁多嘢好快就要加稅!不過,又真係好多人信呢個講法。

 

政府賣地收印花稅咁好搵,要扮窮只唯有多多搞基建起呢樣起果樣。要扮窮仲有另一招:若果955億元的盈餘屬實,大家要就要等睇財爺點樣使出十八般武藝,將政府的餘錢當成支出分發到好多個擺多過用嘅基金,好似關愛基金、醫療融資等等,扮使錢其實係將盈餘隱藏。呢招近年用得愈來愈多,藏富於N個基金。即係話,香港自由儲備其實唔止14000億呢個數。

 

其實自回歸後,歷任財爺累積估錯數己超過7000億元,加加埋埋足夠做50年全民退保。政府話全民退保會爆煲,小編聽咗想爆粗就真!

Share On
Dislike
0
曾俊華     全民退保     財政預算     財政儲備     盈餘     今日米路     千億盈餘     估錯     估錯數

發表評論