無綫前業務總經理陳志雲早前接受《蘋果日報》訪問時指,電視人材青黃不接的情況早已存在,惟電視台流水作業式製作影響創作空間,加上內地節目需求吸納了大量香港人材,令香港人材買少見少:「但冇辦法,香港冇競爭,冇機會畀佢哋去磨刀,咪去內地!」

 

亞洲電視將營運至4月1日,是歷史上首間不獲政府續牌的電視台;幾乎壟斷整個電視界的無綫近日公布業績首度出現虧蝕;而港視發牌則遙遙無期。陳志雲擔憂政府此作為不發新電視牌藉口,他說:「佢哋會話:『我哋都話啦,唔可以發咁多個牌,而家連龍頭大哥業績都變成咁,再發牌嘅話嗰間都冧埋咪重死……』我最擔心呢樣嘢,如果先前申請免費電視牌照,發咗畀王維基,唔會有今日現象。」

 

陳又指,新媒體的堀起,加上市場並沒有競爭,故無綫只會退步,「因為冇競爭唔單止冇進步,係會大退步㖭!我做乜要擺更多錢落去?你係咪都要揀我㗎啦!但當你冇人去爭、冇咗個話題,大家想睇免費電視嘅意欲更加低,加埋新媒體愈嚟愈蓬勃,免費電視步向滅亡日子就愈嚟愈近,所以大家睇到觀眾嘅流失,都係主要原因之一,點挽回觀眾睇免費電視,一定要盡快增加真正嘅競爭,而唔係求其畀咗另一個台(港台)做公營廣播。」

 

至於被問到即將開台的ViuTV,陳志雲指對其主打非戲劇節目的製作方向有所保留,他說:「嗰類節目持續性好緊要,《跟住矛盾去旅行》,個矛盾都會完㗎,睇落係咪無以為繼?ViuTV走呢條線,TVB執行董事鄭善強都曾經話:『佢哋其實做緊J2,J2都係得1、2點收視,因而佢哋做乜嘢應該對我哋冇乜影響!』」對於ViuTV加入「戰場」會否影響市場競爭,陳笑說:「多個人入嚟玩總好過冇,對於佢(ViuTV)競爭力有幾大,就要睇佢肯投入幾多資源落去。」

Share On
Dislike
0
無綫     亞視     王維基     港視     ​亞視     陳志雲     電視     發牌     VIUTV     退步     競爭     虧蝕

發表評論