曾國平

美國維珍尼亞理工大學經濟系副教授。

人類一思考,上帝就發笑,政府一教做生意,也有一定娛樂性。

政府推出的士計劃改名不再「優質」(叫得「優質的士」,即係暗示普通的士陰質啦!),600輛「專營的士」建議由3個專營權擁有,為期5年不得轉讓。收費比普通的士貴幾成,收現金之餘,必須有最少一種電子付款方式,營辦商必須提供手機應用程式給乘客使用,同時必須為司機提供培訓課程,車齡亦不准超過5年,更要有Wi-Fi服務。

呢樣必須,嗰樣不准,相當麻煩。最難以置信的,莫過於「專營的士」只可以在指定的士站上落客,連一般的士站也不准使用!指定地點仲要手機應用程式做乜?找不到政府相關文件,我懷疑(也希望)這是各大傳媒的一場誤會。

重重規限之下,生意值唔值得做?我唔知,但根據政府消息,政府聘請財務顧問作的評估相當樂觀,舉例話,現時的士牌價值六百幾萬元,每個專營權涉及200輛的士牌,絕對「有得做」。(同一政府消息來源亦重申,Uber合法經營將會加劇本港交通擠塞情況,對現有公共交通工具亦有影響,但政府非常歡迎Uber投標「專營的士」……)

限制較多年期有限,常識話我聽,專營權肯定唔值六百幾萬元一架,至於營辦商有冇得賺就有待實驗證明。
有辦你睇的,當然係規定同樣煩到極的「美食車」先導計劃。除了車內外各種的安全要求,最騎呢的莫過於美食車只准在8個指定地點之一營業,營業時間同時受場地所限。

營運權為期兩年,政府官員專家根據申請人提出的食物質素決定專營權花落誰家(例如「食物概念是否優質及有創意」)。8個地點如何選出來?政府官員的飲食口味有多可靠?天曉得,只知道部分地點人流不多(甚至有工程封路),「美食車」平均生意甚為慘淡,短短兩年不容易捱得過。

何解政府教做生意,多數搞笑收場?典型的經濟學答案,是政府運作並非由利潤引導,賺好蝕好,鐵飯碗依舊,同錙銖必較的商業世界是兩回事,做得咁好為乜?
深一點的政治經濟學答案,是這些政府計劃為各方利益團體競爭遊說下的產物,加呢樣限制保護我的利益,加嗰樣條款維持你的地盤,結果是計劃四不像,兩頭唔到岸。

最簡單的常識答案,是政府官員管呢樣限嗰樣的習性難改,天馬行空的想像離地面太遠,以為聘請顧問開幾次會就可以構思出發達賺錢大計。 


作者為香港亞太研究所經濟研究中心成員/美國維珍尼亞理工大學經濟系副教授/城市及地區禦險力環球論壇附屬學者
http://www.facebook.com/economics3.0 

Share On
Dislike
0
經濟3.0     曾國平     美食車

發表評論