一個高登仔

當人人走去連登之際,我仍然希望以「高登仔」身份觀察世界

細個玩《三國志》果陣,總係會有一種諗法:「假如有日有隻遊戲用世界地圖玩《三國志》咁就過癮。」之後廿幾年雖然都出過一啲類似遊戲,例如《Europa Universalis》、《Hearts of Iron》系列,但由於系統實在太複雜,好多人都係望之卻步。不過今次真係比我搵倒一隻一般人都可以駕馭得到、仲要係免費添──不過唔好以為我賣廣告,因為響文章末段我都會講呢隻遊戲有一個致命缺憾

 

響《Conflict of Nations》你一開始可以揀世界地圖上任何一個國家開始遊戲,跟住你可以做嘅就係搞內政(提升工業水平、興建各種軍事設施)、起兵同調兵,但如果你係第一次玩的話,你會發現一項驚人事實:就係當你花幾分鐘處理哂你可以做嘅指令之後,跟住就無嘢好做!

 

當然作為一隻免費網絡遊戲,為咗令玩家唔好太困身,都會令你唔需要花太多時間響遊戲入面;但《Conflict of Nations》係善用咗呢個機制而帶出一個響軍事戰略入面好重要嘅概念:時間元素。

 

真正嘅行軍打仗,並唔會話呢一刻你想打B城市,下一刻軍隊就會去到開始攻擊;你就係要等軍隊集結、部署、移動,全部都要時間,就算係交通發達嘅今日,無番十幾廿個鐘係做唔倒──更甚者係假若你行軍到中途想取消行動或者轉移目標,就係要用同等嘅時間番轉頭。

 

 

如果你屬於休閒型玩家,當然可以等幾個鐘甚至半日先睇一次你啲軍隊行軍狀況,但如果你係沈迷型玩家,你就會成日Log in入去為你啲部隊進行微調──不過就算你花幾多時間都好,基於你國家嘅資源限制,同埋軍隊行軍始終要好長時間,所以登入得密唔密個遊戲,雖然響效率上會有分別,但仍然未致於會令你反勝為敗或者反敗為勝。

 

結果你玩玩下,就發覺自己真係好似響War Room嘅將軍咁:好多時候其實你做唔倒啲乜,但係就係會蘿蘿攣走去睇下軍隊行到邊個位置、搵下有無更有效率嘅路線,甚至乎因應敵人部署又再次作出唔同調整──果種因應「時間」產生嘅焦慮感,就係《Conflict of Nations》最大嘅吸引力──響高登討論區周不時就有人會問,「究竟《Age of Empires》有無可能被超越?」(https://goo.gl/2Vsvyz ),雖然RTS方面我覺得比較難,但如果只係講戰略調度、響地圖上面成為一個征服者果種浩瀚氣魄,《Conflict of Nations》就真係做到。

 

不過我都唔係一面倒吹捧呢隻Game,因為佢仍然有一個致命弱點:就係課金問題。我當然明白一款遊戲係要營運就一定要賺錢,問題係《Conflict of Nations》嘅課金功能實在你太過「包羅萬有」:響遊戲入面有一樣嘢叫Gold嘅貨幣,用佢可以加快武器生產同開發時間、購買各種各樣你缺乏嘅資源、甚至連軍隊損傷都可以用Gold即刻補番──雖然遊戲公司為咗「平衡」呢隻遊戲,經已將各式各樣嘅Gold付款提到好高,問題係呢個世界真係有班為咗勝利不擇手段嘅金主:我曾經問過一個最後同我纏鬥到最後,但最終仍然輸比佢嘅對手,佢同我講為咗贏我同我啲盟友,響隻Game入面已倒咗1000美金……

 

雖然,就算有課金玩家,只要你唔係咁啱揀咗一個響佢隔離嘅國家,其實係唔需要太擔心早期會比佢欺凌;一般來講直到最後決戰之前,課金玩家都唔係會好打擾倒你嘅雅興,如果你只Enjoy過程而唔係結果,《Conflict of Nations》都可以帶比你相當時間嘅快樂;但如果你無諗住比錢,就要有心理準備去到遊戲後半部,隨時會由一切順利突然間被打入地獄。

Share On
Dislike
0

發表評論