曾國平

美國維珍尼亞理工大學經濟系副教授。

問答比賽第一題:荃灣有幾大?

我鬼知,但從偉大的互聯網可以找到答案。整個荃灣區共有6,000公頃,人口超過30萬。
 

問答比賽第二題:粉嶺高爾夫球場是否跟荃灣一樣大?

按常理推斷和有限觀察,不太可能。球場面積只有172公頃,不夠三十分之一個荃灣。拆球場起屋俾30萬人住,一定會好迫好悲情。

先問大家兩個無厘頭的問題,皆因我在網上和報章頻頻見到以下句子:「高球場佔地170公頃,面積相當於整個荃灣」、「170多公頃用地與荃灣面積相近」、「粉嶺高爾夫球會土地面積約有172公頃,面積大於荃灣」、「粉嶺高球場佔地170公頃,面積幾乎等於整個荃灣」、「粉嶺高爾夫球場面積可比整個荃灣」,諸如此類。

講出或寫出以上句子的,不是「無知」市民,而是時事評論員、立法會議員、社區組織代表、前立法會主席、本土研究社代表。

小學地理題,照計唔使大學地理系畢業。心諗冇理由咁多人錯,一定係我搞錯,例如眼花睇歪Google Map,或眼矇睇少個零之類。經過多番查證,終於在某大媒體找到最似樣的答案:「市中心共有7個選區,包括德華、楊屋、海濱、祈德尊、福來、愉景及荃灣中心,當中合共約153.81公頃」,原來所謂的整個荃灣,指的只是荃灣市中心。

「整個荃灣=荃灣市中心」的城市想像,的確需要好大的想像力,但至緊要是有強勁的煽動力。荃灣喎!咁大塊地打高爾夫球不起屋,果然是權貴無視貧苦市民的水深火熱。於是一傳十、十傳百,人人都話將球場等同荃灣,左翼階級論述成功入屋。

見網上對「阿叻」的另類公關手段議論紛紛,尤其是恥笑球場將起屋,導致17萬人失業這個神奇數字。其實好老實講,各方陣營的討論水分根本不相伯仲。就如早前本土研究社聲稱公私合營,可為地產商帶來5萬億元收入的驚人數字,對數字有點概念都會覺得誇張,到網上一查又會發現最大果個地產商市值都係得幾千億元。

更搞笑的,是本土研究社的友好姚松炎教授,最近在電視節目提到一個較保守的估算,只有二千億左右,比「五萬億利益輸送」這個soundbite差好多好多倍。

好無奈,「土地大辯論」的討論水平真係好低,低到好似阿叻有份拍的賭片一樣,你大我一個荃灣,我又大你5萬億元,數字水分十足,口號代替思考,吹大佢呃咗like至算。

Share On
Dislike
0
曾國平     高爾夫球場     土地大辯論     土地問題     荃灣

發表評論