在美國「鄉下」生活夠地方,DIY可以去到好盡。單以食來講,我們的麵包、意粉拉麵、熱香餅都由麵粉做起,早午晚三餐大都自己搞掂絕少外出,試過「複製」茶餐廳款式,但玩得最多還是日本家常菜,最新娛樂是把蔥切幼,放進冰水裡捲起來伴碟。我飲食DIY的規模是小兒科,還未在後園種菜、烤咖啡豆甚至整蝦餃燒賣。

 

香港廚房雖然狹小,飲食DIY一樣流行,網上教煮嘢食短片的view數以十萬計,焗麵包、磨咖啡等「優雅」活動更是中產品味指標。其實自己計計數,飲食DIY一點不便宜:材料成本事小,由屢敗屢試到煮出一定水平的投資(期間少不免浪費材料),到實際煮食本身所花的工夫(例如意粉做得快不容易),時間成本才是最襟計。由於煮的量不多,平均成本隨時貴過出街食水平相若的一餐。

 

為什麼大家仍樂此不疲?煮食本身有娛樂價值和滿足感,自己由頭做可以確保材料健康(少油少糖之類),新鮮做出來的東西特別好食(意粉一試好難回頭),這些都是重要原因。科技進步,也方便了食譜傳授,畢竟睇片容易上手過睇圖文,而更更更重要的,是社交媒體可以拍照呃like呀!若果冇得網上展示製成品,我估大家會整多好多餐即食麵囉…

 

曾國平
美國維珍尼亞理工大學經濟系副教授

Share On
Dislike
0
曾國平     煮食

發表評論