近期環保潮流是棄用膠飲管,香港的大學一早在校內食肆推行相關政策,舉辦無膠飲管日、膠飲管收一蚊之類,一眾大型連鎖食肆亦爭先仿傚。

 

在某大學咖啡店有次難忘經驗:店內沒有膠飲管供應,當然也沒有樽裝水賣,校方規定要站在環保尖端,同時咖啡店設計又甚為開揚,趟門一排全部打開,為保持店內清涼,冷氣就要跟室外三十幾度的高溫搏鬥,於是要調到殮房級數,開行馬力十幾小時。一邊棄用膠飲管,一邊豪花電力,相映成趣得有點荒謬。

 

我少飲凍飲,「走塑」對我影響不大,就算飲,依家都怕食肆擅自為凍飲插上一支不銹鋼飲管,引發我的無窮衛生想像,凍飲再好飲都冇胃口飲落去。

 

先不論膠飲管到底佔海洋垃圾百份之幾,也不論膠飲管的替代品有幾環保,作為經濟學者點睇棄用膠飲管運動?在社會風氣壓力之下,企業自願棄用飲管是自由選擇,一方面企業或可以靠環保形象增加生意,一方面愛好環保(又或其實不太環保,只求買張贖罪券心安理得)的顧客又願意多付錢或麻煩一點改變習慣,你情我願沒有什麼好批評的。最怕是運動變成由上而下的政策,要成立「控膠辦」監察食肆遵守膠飲管條例,咁就真係比膠飲管更膠了。

 

曾國平
美國維珍尼亞理工大學經濟系副教授

Share On
Dislike
0
曾國平     飲管

發表評論