挽歌之聲

音樂和填詞愛好者,間中會大文豪上身,寫上一兩篇抽水文。

一首傻女,一張陳年舊照,一個無訂閱者既頻道。

無好似柏豪神鋪天蓋地既網上宣傳;無好似兒夜姨野以夜儀野咁高頻率既音波。

點解點擊率都會係短短幾日之內就數十萬,上得仲快過小明坐果架火車?

 

呢首全新編曲同全新演繹既《傻女》,真係帶比我地全新感受。

唔聽都唔知,原來呀DON已經將哭腔練到可以無視音準同拍子,達到左先天境界。

呀DON用李宗盛念白式既唱法令到感染力幾何級數地增長,令大家都深深感受到佢果種痛同無奈。

歌入面帶出既思念同矛盾,聲線同處理都充滿後現代主義既特色。

唔怪得知趙學而都要出黎抽水上蘋果動啦。

 

聽完全首歌,再重播最後十秒幾次,廣大樂迷都只能有一個結論:

「唉,唱歌呢啲野,我地識粒休止符咩…」

 

呀DON係娛樂圈咁多年,見過大大少少既場面,佢番大陸既辛酸史相信大家Google下已經見到唔少。

講唱功,佢唔係話勁。但樣子,的確係見得下人。

想當年佢同女神MANDY既男女組合可以話係我地一眾小學雞眼中既金童玉女。

唔通真係新娘結婚了,新郎不是我,所以睇唔開玩到咁大?

顯然唔會。咁多年過去,我睇佢都唔似熊貓專一至死;況且最近盈盈要出軌借種,樂樂都要捐精救國。

相信DON and MANDY都係你有你既生活,我有我繼續關節痛。

 

唔係感情缺失,難道真係好似呀DON咁講,音樂唔係得一個模式既!

呀媽叫你去惠康買個蘋果,你可以選擇唔去惠康,去百佳,去街市都得。

你可以買普通蘋果,富士蘋果,青蘋果,但係唔可以買個橙下話?

而呀DON就係放左個橙出黎。呢個橙正正係一個極好既Gimmick。

而呢個橙令到食慣左蘋果既你同我措手不及。聽完隻歌二話不說轉身射個三家姐SHARE左先。

容我張狂地認為呢首歌同音樂性無關。

一個創作力高,唱功好,唔抄歌而又打NBA既柏豪神,如果派一隻口水歌去電台,可能隻歌比個DJ播住介紹既時候個DJ都係第一次聽。

一個浮沉多年,無後台,唔紅既歌手,如果派一隻正正常常既歌去電台,相信隻碟十居其七未播過都已經轉贈左比劉江華。

試諗下,如果《傻女》唔係唱到好似送葬既輓歌咁,如果最後無失聲痛叫,聽完既你同我,會唔會因為要恥笑佢而轉發比其他人聽?

如果首歌唱得好似軒仔咁好,你會係心入面讚一讚李逸朗,然後聽完就關左佢。十個人入面可能得一個人會有SHARE既念頭。

 

聽完《傻女》,你會想聽下佢隻碟其他歌會唔會都係咁。

又或者你會SEARCH下李逸朗個維基睇下佢有咩野慘不忍睹既經歷。

甚至你按入黎睇我打既呢篇廢話,都係因為一首《傻女》。

從推廣宣傳既角度而言,李逸朗已經係一個成功既例子。

 

李逸朗《冷戰》
 

挽歌之聲 facebook 專頁:https://www.facebook.com/singtosay


 

 

Share On
Dislike
0
挽歌之聲     李逸朗     傻女     笑談李逸朗

發表評論