情人節即將來臨,作為女球迷既我,今日比啲建議一眾男球迷,關於阿仙奴對李斯特城場波既感想就最後先講啦。今日既會考題目…唔好意思,係探討題目,就係:與何與你的球迷女友共渡情人節?

 

簡單黎講(其實係字數有限),球迷唔多唔少都會同佢捧果隊球隊有啲相似既地方,係到就約略分成BIG 5:

 

曼城女球迷:

如果你女朋友係一個曼城女球迷,恭喜你!作為曼城女球迷,佢地洗錢通常都唔會慳住荷包,佢地同藍月亮高層一樣覺得千金難買心頭好,只要係人地吹捧既野,唔理幾貴佢都會買到手,而且絶不吝嗇,價錢對於佢地黎講唔係問題,如果你有個曼城球迷女友,你只需係情人節前花多啲時間洗下佢腦,將你想買既平價禮物吹捧一下,等佢地覺得係喎真係好多人都覺得好好,佢就會不理價錢欣然接受,仲覺得有你呢個男友真好!

 

曼聯女球迷:

作為拎過最多英超冠軍既隊伍球迷,情人節你就唔好送杯比佢喇,因為佢對呢樣野已經無感覺,至於食乜送乜,佢地基本上都睇得好淡喇,不過當你情人節同佢食飯食糖水食乜飲乜都好,切記:餸唔可以有椰子,甜品唔可以有椰奶,飲酒唔可以有椰子味,對佢地黎講,有個「椰」子既男人曾經幾乎將佢地打落地獄,大忌呀!

 

利物浦女球迷:

利迷女朋友真係無得彈,就算你窮到燶,情人節同佢食M記,帶佢行海旁,然後送枝廿蚊買既膠花,只要你肯承諾,總有一日你會比到幸福佢,佢都會成個人甜哂,同你甜甜蜜蜜咁過情人節,正如利迷一樣,佢地深信等待係會修成正果,而且唔會計較到底你(球會)洗幾多錢,定係唔用錢。

 

車路士女球迷:

作為一支鍾意收納中場既英超球隊,藍軍實行緊一種叫「我用唔哂都唔益你」既策略,係其他球會想買中場球員時,佢地就出手截劫。如果有巴打既女友係車迷,我諗你要自求多福了,你女友除左個樣唔似摩佬外,好大機會性格係相似八成以上,講野串得黎又帶骨,不過佢地都同摩佬一樣愛面子,都會保護你面子,就算你唔記得買禮物,佢都唔會當街車你十四巴。

 

阿仙奴女球迷:

我幾乎可以肯定話你知,基本上女阿迷都有啲精神分裂,可能佢上一秒就嬲緊你,但下一秒無啦啦同你有講有笑。阿迷係好有原則,一就一,二就二,你應承左佢既野就一定要做到,如果你要佢等無限48小時,佢應該會用粗口黎令到你耳膜同菊花都爆開。如果有位阿迷女友既巴打,你咁岩係細過你女朋友(我指年紀),咁相對你會受到較溫柔既待遇,阿迷同幼齒,唔洗解釋喇下話?

 

戴返個頭盔先,以上所述如有雷同實屬巧合,如果情人節當天不幸比女朋友黑面,問候家人,甚至動粗,咁…真係唔好意思,你知啦,投資涉及風險丫嘛,我係到祝大家情人節都甜甜蜜蜜啦。下,你話如果你無女朋友咁點?咁你應該要睇下面果段阿仙奴對李斯特城觀後感。

 

而家就講一講阿仙奴以2-1險勝李斯特城既聯賽賽事,李斯特城作為一支榜尾既球隊,到左而家最後直路,佢地打法比前半季更狼更兇狠,畢竟搶分係非常之重要,就算只有一分都對護級有重大影響,阿仙奴原來以兩球領先,但係當李斯特城追返一球既時候,氣勢更加係如狼似虎,向阿仙奴發動狂攻,加上槍手後防線明顯有疲態,包括我在內,一眾阿迷又要喪撳平安鐘,好彩無驚無險都三分落袋。

 

今場特別要講既係,係我印象中,路基斯,卡蘇拿,奧斯爾同山齊士係第一次四個人一齊以正選身份上陣,雖然小妹暫時唔係寫左好多篇,但其實熟悉我既朋友都知我對呢四位球員特別喜愛,如果加上法明尼,就係小妹今季既阿仙奴我最喜愛中場線,之但係可能因為佢四個極少機會拍住上,令到中場線有啲唔夠火力,加上用山齊士打最前一格,似乎有啲吃力,佢同奧斯爾都成為對手重點招呼球員。

 

其實要用山齊士打正前唔係唔得,但又係老問題,教授堅持既433陣式,令到本身已經高水平既山齊士成為漆黑中既螢火蟲,好鮮明,好出眾,對方球員就重點防守佢,雖然禾確特入左一球,但狀態仲係有待提升,呢個時候要山齊士打最前,其實應該有個前鋒同佢拍住上,一來可以分散防守球員注要,二來可以互相協調,即係其實我既意思係,點解唔試下442呢?

Share On
Dislike
0

發表評論