最近呢兩個星期實在發生啲好唔如意既事,暫時就唔詳細多講,等到事情真正解決之後,小妹會另開篇章詳細分享呢兩個星期發生既事情,直頭係可歌可泣,聞者傷心,聽者同情,直頭可以出個中篇故。

 

有少少可以透露既係,小妹黎到英國工作假期,人又唔識,真係靠香港既朋友幫忙,先可以順利搵到屋又搵到工,雖然呢啲野自己都搵到,但有朋友幫你真係會方便好多,又安心好多。只不過要提下大家,出外靠朋友,但真係唔好靠朋友既朋友,小妹就係誤信朋友既朋友(講明先,小妹位朋友係好人黎,有問題既只係果位朋友既朋友),朋友都話會幫下你,而朋友個朋友,反而會利用大家都識同一個人既心態黎同你扮熟,套交情,然後搵機會呃你,又劏到你一頸血。

 

今次就唔講關於足球既事,純粹分享下呢兩個星期小妹既感受,簡單講下係有關租屋租約既問題。一個人係外地,出左咩事真係只能靠自己,而且又未必有錢訴諸法律途徑,而且對方仲會動用佢係當地既人脈黎威嚇你,最慘係,朋友既朋友仲係香港人,呢樣先最令人失望。

 

人在異鄉,搵到同自己講同一種語言既人,唔係話對方有咩義務照顧你,我梗係明人地又唔係同你有親,點會照顧你,不過話哂大家都叫香港人,我唔求你照顧我或者守望相助,但你都唔好有心呃人丫,所以難怪世界上好多人仲係睇唔起華人,係陌生地方,你地講同一種語言既人都唔互相照應下,反而係諗計點樣搵對方着數,情況就好似香港咁,大家各有各搵錢,為左賺多幾個錢,犧牲其他人都係理所當然。

 

等事情完滿解決後,小妹先開個篇幅講返啦。不過呢兩個星期都唔係無好野既,又唔知算唔算好事,上個星期小妹終於去左東北三雄之一:新特蘭光明球場,行左佢地個球場TOUR,唔講由自可,一講都有把幾火,至於咩咁火,留返下回分解。

Share On
Dislike
0

發表評論