上篇講到第四次到訪新特蘭,終於入到去行個TOUR喇!總算了到個心願,唔洗三過家門而不入咁。去到接待處由職員點名,等齊參加呢日TOUR既人,導遊團就出發。就好似上篇講過咁,光明球場既TOUR係無得比你揀唔要導遊自己行架,不過調轉講,有專人講解都幾正既,但係小妹係英文有限公司,加上英格蘭東北地區口音好重,聽起上黎都幾困難,成個TOUR只係明七八成到,真係要而惡補下英文先得。

 

首先導遊伯伯講下佢叫咩名,但係我真係唔記得,如果佢曾經係球員,我真係覺得對佢唔住……ANY肥,佢第一樣問下我地呢個團有無人係紐卡素球迷,咁我就梗係唔係啦,但在場九成人都係新特蘭球迷,有一個小朋友,佢爸爸係黑貓迷,佢就同小妹一樣係阿迷。伯伯都話就算係紐迷都無特別既,佢地都好歡迎不同既球迷黎參觀光明球場咁話。

 

伯伯講下光明球場既歷史,咁就梗係講下點解會叫光明球場啦。新特蘭以前主要係一個開採礦業既城市,球場命名為光明球場,係代表地面上有光明指引礦工由礦坑工作完畢後返上地面,亦都係希望新特蘭呢個城市有光明既未來,除左呢兩個意思,新特蘭球會都為社會做過好多善事,捐錢,資助學生,慈善基金等等,另一個意義都係為社會帶來光明。

 

大家行左去球場內既SPORTS BAR,入面會開放比球迷黎飲野睇波,係入面可以睇到新特蘭城市景色,而且入面放左好多波衫,BAR既正中間放哂QUINN既波衫,呢位QUINN係曾經踢過阿仙奴同曼城既NIALL QUINN,佢有句名句係SPORTS BAR出面:I LEARNED MY TRADE AT ARSENAL, BECAME A FOOTBALLER AT MANCHESTER CITY, BUT SUNDERLAND GOT UNDER MY SKIN…雖然佢曾經踢過阿仙奴,但講得出咁既說話,證明佢好鍾意黑貓,如果我係黑貓球迷都冧死。

 

行到去包廂再出去VIP座睇個球場,新特蘭個場真係比我想像中大,作為全英格蘭第五大既球場,真係幾堅喎。係球場一邊既櫈仲油左:HA’WAY THE LADS。HA’ WAY係HAVE WAY既簡寫,有COME ON既意思,但有一點要切記切記切記,新特蘭球迷係講HA’WAY THE LADS,而紐卡素球迷係講HOWAY THE LADS,千其唔好講錯呀,講錯真係可能會比人打,尤其係東北打吡。

 

伯伯話新特蘭既包廂係英超黎講唔算貴,平既話一季只需兩萬鎊。下?兩萬都叫平?維返成廿幾萬港紙喎!不過係一季既價錢,一個包廂又有咁多個位,入面啲咖啡奶茶又任飲,我地眼見都有啲運輸公司呀,物流公司呀,都有個包廂咁,伯伯話好多公司都會整個包廂,比啲員工黎睇下波。唔知以前羅神仲係南華話事果陣,有無比啲RED MR員工坐大球場包廂睇南華呢?講到包廂價,伯伯話佢記得車路士包廂係全英超最貴(居然唔係阿仙奴?!),要成20萬鎊一季,足足係新特蘭既十倍呀!

 

行行下,去參觀主客更衣室,主場果個靚啲,但比起酋長球場真係差幾遠下哈哈。作客更衣室反而比較有趣,掛哂今季英超其他19隊既波衫,不過有啲唔係今季既衫而係上季,但掛左阿仙奴波衫果個位,伯伯話當年柏金黎作客都係坐果到,我梗係唔執輸坐下,吸收下啲靈氣啦,可能踢波都勁啲!最有趣係,當年曼聯作客黎到光明球場,堅尼同費格遜係更衣室係打對角坐,一人佔一邊角落頭,可想而知兩個人既關係有幾差哈哈。

 

參觀下球證休息室,都幾大喎,仲有得沖涼添,入面仲有個好似門鐘既物體,上面寫住5 MIN CALL,好似話係仲有五分鐘開波果陣比個球證撳既,話比所有人知仲有五分鐘開波,要放低幾兩就好快啲喇。然後唔知點解係球員做簡單健身間房會擺左隻黑貓吉祥物,仲可以試笠下,原來真係幾焗架,不過英國唔會好似香港咁三十幾度,我諗戴果個唔會太辛苦掛,起碼唔洗好似旺角着魚裝果位人兄咁,要驚比慈母打到變魚膠啦。

 

參觀下會議室同搞PARTY既房,光明球場內部仲可以BOOK黎搞會議同埋婚禮用架,地方又大又幾靚,可惜我唔係黑貓球迷,唔係我都會考慮下既嘿嘿。講講下,點解新特蘭又會叫黑貓呢,伯伯話有好多版本架,不過最多人知既就係當年有一場比賽,一個男仔帶左隻黑貓入場睇波,踢踢下隻貓跑左落球場,果場又贏波喎,所以黑貓就成為左新特蘭既吉祥物喇。

 

球場內部仲掛左好多新特蘭名宿既相,最大既一張係一個叫做JIMMY MONTGOMERY既門將,佢係為新特蘭上陣最多既球員,總共上陣627場!哇,真係一個好長情,好忠心既球員。到左經球員通道行出球場睇下喇,伯伯叫左班小朋友去撳門口個鐘,我仲諗唔通係提醒球員出場用既,原來係出場音樂黎!仲係相當之激昂!一路聽住我直頭有跑出球場既衝動,不過好彩無咁做,唔係實比人以為我痴線。

 

光明球場TOUR黎到呢到差唔多喇,都行左差唔多兩個鐘,而且走既時候仲有張證書送比每個參觀既人,伯伯仲拎左以前既MATCH DAY PROGRAM送比我地,都算收獲豐富呀。

 

話說小妹朋友幫手買到飛,岩岩過左一輪既英超入左場睇紐卡素對阿仙奴,入去支持愛隊更係開心啦,槍手仲係作客,身為槍迷既小妹梗係要幫愛隊打氣!但係朋友幫小妹買左主隊球迷區既波飛…至於睇波發生咩事,就留返下回分解喇。

Share On
Dislike
0

發表評論