上次講到朋友幫手買波飛,於是我就入左場睇紐卡素對阿仙奴既英超比賽喇。其實每場比賽之前,除左係官網買波飛之外,係球場既類似售票處物體都有飛賣,不過你就要捕住個官網,到底幾時會有飛賣,因為英國人平時無乜娛樂,除左飲酒去賭場之外,就幾乎真係得足球,所以球場有飛賣既時候,絶唔會好似香港波咁送飛都無人睇,你去慢少少,就可以下場請早。

 

至於點解呢次我又會買到飛呢,是咁的,紐卡素對年輕既球迷真係唔話得,係NEWCASTLE大學同NORTHUMBRIA大學讀書既學生,學校係有飛賣既,呢兩間學校既學生都可以好輕易買到紐卡素主場既波飛。咩話?你話香港咁多間大學點解無港超波飛賣?你問下足總點解諗唔到可以咁樣推廣。而且學校賣既波飛仲係唔貴,只需要30鎊,再加1鎊手續費就可以,憑飛就可以入場睇波,咁你話,英國人點會唔熱愛足球呢。

 

但因為係學校買既關係,你係唔會買到客隊球迷區既飛,只會係同主隊球迷坐埋一齊。睇過外國聯賽既朋友都知道,通常主隊會將球場既其中一小塊區域劃做作客區,客隊球迷就坐係果個區域裡面,所謂河水不犯并水,通常果區仲會有特別多保安圍住,以防有人酒後鬧事,因為英國球迷好鍾意係開波前啤一啤佢,所以成日搞到未開波,先興奮,飲到HIGH哂先入場睇波。日光日白飲酒呢家野,我地香港人唔明架喇。

 

由於小妹係一個阿迷,當日都着左件阿仙奴波衫去入場睇波,但我張飛係坐主隊區喎,不過,紐卡素同阿仙奴又無乜仇口,當年4:4都係阿仙奴衰自己比人追返姐,我諗佢地對阿迷應該都應該會友善掛。但原來當你入到場,有幾萬人都係紐迷圍係你身邊時,真係會下意識默默咁拉返件褸既拉鏈……

 

當日客隊既阿迷就只係分得一個角落頭既區域,而且仲係山頂既朋友,但打氣聲音非常雄渾有勁,好多時都將主隊球迷打氣聲蓋過左,邊個話阿迷打氣無聲氣架?而我就間唔中係個位到細細聲咁一齊唱打氣歌,有時候坐我旁邊既紐迷都會望下我,希望佢唔會以為我唸緊經啦。

 

正當我諗如果阿仙奴入波,太興奮會唔會比人打果陣,說時遲那時快,正所謂「銀河唯一基奧特」,雖然唔係鋒線最強人物,但佢為阿仙奴先開紀錄果球,我忍得住唔彈起身,都難掩我興奮既神色,坐係個位到大叫「YES!」,然後我附近既紐迷都望一望我,嗚哇,真係淆底,但又好開心,好彩,英國人真係紳士。

 

作客既阿迷全場都又唱又叫又跳,除左例牌唔關事都抽熱刺水之外,全場波唱得最多既就係銀河俠基奧特既歌,因為佢入左兩粒嘛。熟悉我既人都知我對基奧特有些少微言,無可否認佢入到波又入得多,但係咪咁就代表勁呢,我就有所保留,之不過阿迷高唱基奧特之歌果陣,我心情有些少複雜,而且我無跟住唱,果日基奧特既表現都可以用唔錯同幾好黎形容既。

Share On
Dislike
0

發表評論