唔好意思因為去左個短旅行關係,所以今篇遲左少少,我唔會叫大家包容下,因為包容呢個詞已經被香港啲官用到爛哂,仲難聽過粗口,所以我會叫大家…多多包涵下,哈哈。上次講到黎到英國工作假期打工,要準備啲乜野呢?首先要有個有效既Tier 5 Visa,黎到英國呢邊,係你搵工前,你要打去申請一個叫做NI number既野,我地以下簡稱NI啦。

 

NI nmber即係National Insurance Number,即係類似保險、勞保果啲,就好似係香港你打工老闆都一定要幫員工買勞工保險咁,黎到英國佢唔理你係簽乜Visa黎,你都一定要申請個NI先可以打工,因為到你去見工或者正式返工時,老闆係需要你既Visa同NI影印本。NI既作用就係萬一你打工時遇到乜野意外,都可以睇醫生唔洗錢掛,不過英國睇醫生真係唔洗錢,要藥先要比錢。

 

咁申請NI要點做呢,好簡單,其實上網你都會查到申請個電話,無錯喇,申請NI係一定要打電話申請既,無得上網填表,至於郵寄表格呢,都要等你打左電話去先,即係首先你要買張英國用既SIM咭,順帶一提,英國接聽電話果個係唔洗比錢既,係打電話果個比錢,價錢有平有貴,你又可以睇下自己要乜PLAN,關於電話,我遲下再開篇新既同大家分享下,因為我黎到呢到居然都係局住用緊三……

 

傷心野唔好提住,講返正經野先,咁首先你要打電話去申請NI既電話熱線到啦,無記錯好似係星期一至五朝早九點到下午六點,星期六日同公眾假期係無既(好似係),乖,唔好咁懶,自己上網查下。NI個電話係一定要申請本人打去,可能佢地有錄音掛,呢啲野都係唔好假手於人好。

 

咁你打左去之後,佢地會問你一啲問題啦,例如你邊到黎架,英國地址係乜呀,幾時黎架,黎幾耐呀,黎做啲乜呀,同埋你申請NI黎做乜呀咁,不過佢地啲口音真係幾正,你集中都好難聽到佢講乜,可能係我英文唔好掛,你答哂佢問題後,佢會比個檔案號碼你,你就記低佢啦。

 

到呢到你已經成功左申請既一半喇,跟住落黎有兩種做法,第一,佢會即刻係電話同你約個時間,你直情上去佢地既Job Centre到見佢地,咁佢地就會面對面問你啲問題,然後幫你填好哂野,咁你梗係要帶本簽左Visa既護照去啦,仲有你既住址證明,之後佢會叫你係份表簽名,然後你等大約兩個星期到就會收到封信,信上面有屬於你既NI number。

 

佢地既第二種做法係係電話問完你一大堆野,然後問你住既地址,然後寄張表比你,你填完寄返比佢,佢收到審批完就會寄返有你既NI既信比你,所以你一收到信就唔好隔太耐先寄去喇。最重要一點,以防萬一,當你收到時你記得記得,將個NI入左自己部電話到先,咁可以方便你隨時查返,而果封信,係千其千其唔可以唔見,唔好唔見,唔見左你真係會幾大獲,至於唔見左要點,呢樣我真係唔知喇,或者可以打返去問下點補領。

 

總之NI封信要好好保存,因為你搵工人地請唔請你,同出唔出糧比你,都要睇你有無NI架。而講起英國既最低工資,我無記錯係只要你過左21歲,就係最少每小時6.5鎊,咁當然實會有地方比得低啲架喇,之但係我地工作假期Visa,每星期只可以工作20小時,扣埋啲租都唔會有好多錢剩,咁如果你個老闆係比少啲啲錢,但比多啲工你返,咁呢……拿我無特別意思架,你地自己諗啦,因為比低過最低工資係犯法,拉左都好似罰幾甘,不過又咁講,就算低過6.5鎊,都仲好過香港30蚊一個鐘囉。

 

係呢到我唔同大家J對利記果場波喇,講少少前日車路士大巴死守阿仙奴果場啦。本來呢篇係諗住果日睇完波就打既,之但係女人情緒變化得好快,我見到泰利和波仲開心過翻嗒布歷治老婆個樣,我決定再休息一日。

 

作為一個阿迷,我只能夠講,喂,你伊雲奴域上半場抽山齊士水果幾下動作如果比左黃牌,車仔下半場七十幾分鐘打少個啦,仲可以守得咁易?同埋摩連奴真係無資格話人踢十九世紀沉悶足球,比起果啲,車路士直頭可以叫蠻荒足球。

 

我無意挑起車迷同阿迷既罵戰,大家都知阿迷通常都鍾意自抽,不過咁,有啲車迷成日話阿迷拎住歷史黎J,唔識向前看,但另一方面又以近十年邊個拎得多冠軍黎揶揄阿迷,咁點解你地講近十年又得,我地講近五十年又唔得?我同意唔好成日J歷史,但歷史都係足球重要既一個部份,都係引人入勝既地方之一,無歷史,你唔會知點解北倫敦熱刺阿仙奴誓不兩立;無歷史,你唔會明點解皇馬巴塞之間深仇大恨;無歷史,你都唔會知點解國米同A米分家。

 

要講係英格蘭拎最多頂級聯賽冠軍,可能只有曼聯球迷最有資格,其次都係利物浦。就算阿仙奴唔係最有歷史、唔係最多冠軍,都係我最愛既足球隊,你要話我拎歷史黎J都好,但現今英超二十隊,阿仙奴係唯一一隊升左上頂級聯賽後就未降過班既球隊,我好自豪。假若有一日,阿記真係不幸降班,歡迎大家搵返我呢篇野出黎鞭屍,但阿記依然係我最鍾意既球會,只有呢樣唔會變,我相信好多阿迷都同我一樣係咁諗。

 

發洩完,下篇梗係講下羅馬假期啦哈哈,不過希望大家比少少意見我,大家只係對意大利睇波有興趣,定係可以比我扮下專業講下啲羅馬名勝遺蹟同歷史?雖然我有唔識都係靠維基,歡迎大家留言比個意見。

 

(小編的話 : 應該用Sell而非Sale,但為了保持文章的原汁原味,所以標題還是保留作者的原標題。Sell 是verb,而 sale是 noun。)

Share On
Dislike
0

發表評論