十二月三十日私隱專員蔣任宏先生於其網誌再次談及「被遺忘權」,佢「呼籲反對「被遺忘權」的人士保持開放態度,從不同的角度重新檢視這個議題。」

 

鍵盤戰線都呼籲私隱專員擘大佢雙眼,睇清楚「被遺忘權」係邊度提出黎,歐洲人權狀況同香港有咩唔同。人地歐洲各國係世界新聞自由指數年年排十名內,香港?由2002 年第18 位跌到 2014 年既第61 位呀!跳樓都無跌得咁快!(註一)「網絡洗腦被遺忘權」已經令到好多新聞搜尋唔到,英國衛報同 BBC 都係受害者(註二),你話無損新聞自由?「網絡洗腦被遺忘權」根本係令香港新聞自由雪上加霜!

 

你以為o係 Google 搜尋唔到就係一了百了,你自己都講「原來的資訊會繼續存在於源頭,並可以在網上供人直接查閱。」你只係令人難左去搵資料。而事實係,Wikipedia 同 BBC 為左對付呢個無謂既「網絡洗腦被遺忘權」都製作左被移除既縺結清單。呢個所謂「被遺忘權」根本係治標唔治本既鴕鳥政策。

 

而乜野係「不完整、不相干、或以原本收集資料的目的來說是超乎適度,以及過時」既資料?唔完整,補完後咪完整囉!唔相干,同邊個唔相干?過時就要刪除,你老人家都過時,你唔 delete自己?「以原本收集資料的目的來說是超乎適度」?咁你條私隱法廢架?條保障資料原則第一條 (1) (b) 係垃圾黎架?根本以呢D原則去決定網民可以搜尋到D咩係多此一舉!

 

同埋你當 Google 真係神呀?一間商業機構點解可以比咁大權佢去決定網民可以搜尋到D咩?佢只係一個網絡世界既中界人,佢唔係神!佢更加無權做網絡判官!決定睇D咩或者搜尋D咩係網民既自由。

 

最後,宜家o係香港,好多人已經不停提出,要對香港人進行思想改造、再教育或「再啟蒙」。互聯網係我地最後一條防線,我地堅決反對「網絡洗腦被遺忘權」,絕不退讓!


 

註一:Reporters Without Boarder, Freedom Of Press Index: http://en.rsf.org

註二:EU’s right to be forgotten: Guardian articles have been hidden by Google http://www.theguardian.com/…/eu-right-to-be-forgotten-guard

Google removes 12 BBC News links in 'right to be forgotten'

http://www.bbc.co.uk/news/technology-28851366




作者簡介

鍵盤戰線(下稱「鍵戰」)創立於2011年,是一個矢志保護網絡自由的非牟利組織。鍵戰成立之初的主要工作是處理2012年的版權條例修訂草案,即坊間俗稱的「網絡廿三條」,以保障網民的言論及創作自由。


鍵戰堅信網民的權利不應受到任何形式,不論是版權法、私隱法等的過份干預,因此我們十分關注各種有可能影響到網民權利的議題。我們希望透過參與及舉辦各種活動,例如遊行、論壇、立法諮詢之類的活動,喚起公眾對網絡自由的關注,從而建構一個開放及自由的網絡社會。

鍵戰現時正在處理的議題包括2014版權修訂條例、私隱法(被遺忘的權利)以及其他網絡相關的議題。我們今後將繼續為網民發聲,捍衛網民應有的權利。

Share On
Dislike
0

發表評論