董建華的「團結香港基金會」,尋日就房屋政策推出第一份研究報告(由港大王于漸、阮穎嫻、該基金的研究員曾維謙撰寫),入面提出了好多建議,成份報告百幾頁,今日米路就唔一一介紹喇,今日只想講講入面的公屋政策。

 

根據報告提出的補貼置業計劃,住戶能選擇可租可買或先租後買新落成公營房屋,更提供低於市價七折(最低半價)的折扣。即係話,只要(扮)窮一段日子買起層樓,之後就一世冇住屋煩憂。

 

政府俾咁大著數,講緊隨時係約200百萬的利益(以市值400萬的公屋,半價出售免補地價計算)。因為公屋租金同私人樓租金相差太遠,仲要耐唔耐可以免一兩個月租,經已有唔少市民話上倒樓同中左六合彩無分別;而家仲要由你入住公屋開始經已可以選擇「先租後買」,即係變相六合彩加碼200萬,你話市民點會唔更「落力」申請公屋?

 

報告未有分析醒目香港市民的反應;但可以預期,一方面虛報收入、資產的情況將會更普遍,增加監察成本;另一方面,又會令市民更想搵以現金交易或人工低的工作,以求符合申請條件,扭曲勞動市場──以二人家庭黎計,你寧願月入一萬六千一百幾但上倒樓可以將來買到間公屋,定月入兩萬蚊但要捱貴租兼唔知幾時儲倒首期?政府為「福利抽獎」加碼,市民爭奪「獎項」帶來的各種浪費就自然會增加。

 

政策製造小部分行大運的市民,引來大部分市民的葡萄甚至怨恨。土地問題真係好難好難解決!

Share On
Dislike
0

發表評論