原本用作「樓換樓」的「煥然壹居」位於啟德,是交通不俗的好樓盤。今年七月,市建局決定將其特價出售,但不接受單身人士申請。

 

據商台報導,有人到平機會投訴市建局違反《家庭崗位歧視條例》,搞到市建局幾個月後急急開會,昨日決定接受單身人士申請,而且申請條件跟兩人或以上家庭一模一樣,排同一條隊。

 

如此一視同仁,夠哂平等夠哂無差異,但諗諗又好離譜。家庭申請上限為月入6萬及資產300萬,一條友又係6萬及300萬,咁對非單身人士咪好唔公平?我兩公婆一人3萬養兩個仔女申請得,你一支公月入6萬又申請得,呢啲先叫唔公平喎!

 

據報導,屋苑價過萬,最平的單位叫價370萬,即係原價460萬打八折,政府津貼90萬。面積更大的,減價更加係100萬以上。即係話,市建局而家同月入6萬的單身人士講,而家間樓賣平100萬俾你,想買就嚟抽籤啦!抽中咗,就有間屋俾你飲吓紅酒食吓雪茄,享受獨自精彩的生活。至於四人大家庭呢,就唔好意思,你得到的優惠一樣咁多不特止,你抽中的機會更因為有單身人士爭,將會大大減低。

 

市建局似乎係怕投訴改政策。唔知有家室的申請人,會唔會又投訴市建局歧視呢?講到尾,政府最應該做嘅係理順房屋供應問題,而唔係搞到成個房屋政策咁複雜,慷納稅人之慨去津貼少數幸運兒。

Share On
Dislike
0

發表評論