人民幣一如所料,經IMF批准納入SDR(特別提款權),比例佔10.92%,在美元、歐元之下,在日圓、英鎊之上。消息一出,議論紛紛,但睇落好多人對SDR唔係好了解,甚至唔知SDR係乜東東,亂講一餐。例如,有銀行高層話:「這對於出國旅遊、留學,還是比較划算的。」唔係吓嘛?

 

早於兩星期前的《今日米路》,已為大家解釋過SDR為何物。簡單講,SDR係IMF製造出來的一個貨幣單位,分配俾每個成員國,成員國有需要時就可用SDR去換貨幣。不過,呢舊嘢搞咗四十幾年,規模依然好細,影響力極低,等錢使出去問市場借多過用SDR。如果唔係人民幣,根本冇乜人理SDR係乜。

 

小編話過「人民幣加入SDR姿勢多於實際」,估唔到遠方有知音人,呢個人就係聯儲局前主席伯南克 (Ben Bernanke)。伯南克發表網誌,指人民幣加入SDR就好似細個成績好老師送星星貼紙一樣,完全係象徵性的動作(Like the awarding of a gold star, inclusion in the SDR is almost entirely symbolic)。伯南克話,貨幣有幾重要係市場決定,唔需要由咩國際組織「加持」,市場交易用得多、央行儲備持有得多,就係國際貨幣囉。

 

今時今日,內地仍有嚴格資本限制,人民幣亦未係全球央行的儲備貨幣,而人民幣離岸中心規模仲係好細,今次加入SDR,只係人民幣國際化的一小小小步,距離目標仍好遠好遠,各位中國大好友唔好吹到咁大。

 

市場最誠實。人民幣在岸離岸價,係公佈消息前後,都冇乜點變動。

 

樂觀啲睇,今次人民幣成功爭取到SDR貼紙,希望可鼓勵到阿爺加快人民幣國際化步伐啦!

Share On
Dislike
0
人民幣     今日米路     SDR

發表評論