大曹

喜歡影相多過打字;喜歡啤酒多過汽水。個人熱愛自由,同時渴望香港有真正民主,經常自問:「我可以為這時代做些甚麼?」

市場普遍認為聯儲局將於下周加息,事關上週公佈的11月就業報告夠靚。有幾靚?失業率維持在5%,非農業新增職位21萬(上兩個月的數字亦上調),維持穩定的趨勢。聯儲局官員近期多番強調,美國就業市場已接近飽和,要在通漲浮現之前「先發制人」,展開加息周期,以免加得遲加得太急。

 

俾着小編係聯儲局官員,近年都會俾美國經濟搞到頭都大。講低息QE導致通漲講左N年,但睇極都未見到物價指數有加速上升趨勢,仲係多1%少少。至於薪金加幅,近幾年一直在2%左右,但大家唔好忘記,薪金加幅係通漲加上生產力增長,即係話從薪金數據中都未睇出有通漲跡象。與此同時,失業率一直跌,回復金融危機前的5%。利息低、失業率低、通漲率低,呢個「三低」現象到底搞乜鬼?聯儲局官員面對加息壓力,但其實又未見到有咩壓力,所以唯有猛咁話通漲就快嚟,有少少「狼來了」嘅味道。

 

無論點都好,要聽財爺話「美國遲早要加息」。呢句咁有智慧嘅說話,令小編擔心美國展開加息周期對香港有咩影響。樓市股市一早預咗加,短期衝擊不大,但麻煩嘅係美國息口高而其他主要貨幣(如歐元、日元)仲係極低息的情況下,美元只會愈走愈強。美匯指數過去一年已升左超過一成,未來會唔會再創高峰?在聯繫匯率下,香港的出入口、物流、零售股務業會受多大打擊?再加上內地經濟前境麻麻,香港未來一年經濟會唔會好暗淡?

Share On
Dislike
0
美國     聯儲局     經濟金融     今日米路

發表評論