藍友斑

建築師、公司合伙人,業餘寫作,夾雜於新舊世代之間,寫盡港式生活故事。

藍友斑發現自己最近成日講社會政治,本身寫專欄係講生活花邊事,但想深一層,近來生活上最花邊的事,都係同政治有關。其中一個人我實在非常在意,無錯,就係參加新界補選的前議員、「新思維」的黃成智。

點解黃成智咁令我在意?主要係佢個年開得太差,仲記得早幾日係新聞上,見到「黃成智宣傳巴撞4車」呢個標題,實在非常搶眼,我都忍唔住click入去睇,見到黃成智面懵懵,真係好濕滯,咁又難怪,新年流流,有咩嘢大吉利是過撞車,你知啦,新年最講意頭,佢即將要去選舉,但架宣傳巴士又撞車,有咩寓意大家自己諗。

本身對黃成智呢個人一啲興趣都無,但睇下睇下,又忍唔住發現到好多花邊新聞,自從立法會選輸後,黃成智真係霉霉地,雖然係社工,但呢份工賺唔到咩大錢,後來又選輸區議會,基本上一個當打之人,連續輸兩個選舉,政治生涯都應該玩完;但係好明顯黃成智係唔甘心,於是就伙拍狄智遠組織個叫「新思維」的選舉機器。

事情開始有趣了,「新思維」由唔少由前民主黨舊人所組成,簡單啲嚟講,呢班人的性質係民主黨的棄子,所謂「棄子」,就是得物無所用,留底反而會成為負累,如果要選立法會,佢地一定唔夠基本盤,又開掘唔到咩新票源,所以「新思維」一開始的時候,係以搵政府公職為目標,翻查新聞片段,佢地真係開記者會,希望政府委以公職,相信係唔少人眼中看來,這行為就同乞丐無異,係民主陣營撈唔起啦,於是就反轉豬肚,幫政府講幾句好話,搏有副局長或者顧問一職做下,講到尾,又係搵兩餐。

或者佢地覺得馮煒光(無錯,佢又係前民主黨人)可以做到「白宮發言人」,無理由自己的資歷入唔到政府,特別係黃成智,佢係前立法會議員,馮煒光由始至終,連立法會議員都未做過,正常人俾人如此爬頭,心中自己有不忿,於是公開叫政府請自己,講真,個心態某程度都可能有少少葡萄,anyway,好明顯最後政府無請黃成智,連政府都費時用佢,原因相信係因為同佢的能力有關,一是不停選輸,二是英文實在太差。

相信大家都記得,黃成智有一次公開用英文回應記者提問,但由於英文實在太差太差,因此被大量網民剪片洗板又恥笑,如果你未睇過條片,依家上YouTube搜尋「黃成智」同「英文」兩詞,就一定可以睇到,當時藍友斑係睇了好幾次,次次都好唔爭氣咁笑咗,無計,到底一個人英文要差到咩地步,先至可以講得出「黃成智英文」?佢地叫經歷過港英,有咁上下學歷,到底因咩事英文可以差到咁?如果我係政府話事人,見到佢連小學生都不如的英文應對,真係無可能請得落。

最近黃生又有新搞作,佢中佬身形扮咩「中立超人」,以極低劣的品味及手法拍攝一條短片,呼籲市民支持佢的中間路線,大佬呀,呢條片一望就覺得係十幾年前的拍攝作品,趕客多過搵客;中間選民從來都有大多數,唔係咩出奇事,而黃成智講的「新思維」只係「阿媽係女人」,稱唔上有咩特別洞見,我夠膽在此推論:黃成智今次選立法會,其實係想向政府展示自己幾有影響力,從而令自己更有籌碼入政府做官,如果今次佢少票到保證金都拎唔翻,相信佢的政治生涯真係會玩完。

Come on黃成智,今次再輸慘了,就返鄉下耕田,別再用如此低級品味荼毒市民同獻世吧。

註:新界東立法會其餘補選候選人有梁天琦、楊岳橋、方國珊、周浩鼎、梁思豪及劉志成。

*《斑駁陸離》逢星期二、四刊於《 香港投資日報


藍友斑 Bernard
 

Share On
Dislike
0
立法會     黃成智     斑駁陸離     藍友斑     新思維     香港投資日報     斑駁陸離‬     新東補選     舊思維

發表評論