藍友斑

建築師、公司合伙人,業餘寫作,夾雜於新舊世代之間,寫盡港式生活故事。

樓市回落9%,上唔上車好?

藍友斑呢一個月收到最多朋友的問題,就係問「上車or not」,其實建築師不過是設計者,今時今日樓價之所以咁貴,最大問題都係建築成本,香港地目前人手短缺,政府又多基建,所以工人真係唔夠。

Let’s say一層樓起完,賣萬幾兩萬蚊一尺,當中工人同製造成本大概佔30-40%,仲未計其他工錢,香港依家啲樓貴,完全有得解。當然新盤還新盤,但二手樓價,至今都係跌了9至10%左右,參照番各大地產網的數據,即是返到去2014年的水平,而2014年的樓價比起1997年時,整體都仍然係較高。

換言之,樓市其實絕對有空間繼續插價,但無人知道係幾時,都係個句,知道樓價幾時大跌,就已經係神;藍友斑的表姐夫都算係香港樓市神話的其中一個經典故事,2003年佢斥資買下一整層的工廈收租,今時今日賣走任何一間,都已經回本有凸,估中一次後成功入市,基本上就可以食番樓市升浪,收租之餘又賺市價,人生從此無憂無慮了。

識得唔少人話「樓價10年為一個cycle」,近來我睇到兩篇比較有趣的文章,都係講黃成智買樓,去睇一個人的財富增值,每個人的眼光、智慧、想法、胸襟都唔同,討論入市決定是否靚,最後都係講成交價。如果你成交價高,即係比其他人買得貴咗,買貴,就係買錯,無論你有咩解釋,市場永遠最現實。

藍友斑喺幾年前已經置咗業,個陣樓市無記錯都係低潮期,入市完全靠自己係有點難度,但只要家中可以支持三、四十萬,份糧真係夠供樓有餘,換言之,香港樓市最大的問題,係樓價不停升升升,但人工完全無升過,如今的人工同十年前的人工,其實真係無太大差別。

後生一輩生活艱難,藍友斑都算有切身體驗,早兩日我辦公室請admin,本身人事部寫起薪13k,我自己覺得費時換人換太密,不如請個貴少少的,我諗過開18k,點知俾人事部阿姐話我根本唔使咁貴,寫15k都大把人爭住報;我唔信,叫佢寫15k,一有CV即刻FWD俾我。

點知過咗一晚,第二朝藍友斑返到公司,已經收到超過130份CV,我個mailbox一口氣被炸爆,試問今時今日已經係2016年,當中報名者有唔少都超過5年工作經驗,於是我不得不問人事部阿姐,個市真係咁差咩?佢就笑笑口,話如果我寫13k,會收得仲多CV,因為好多Fresh grad爭崩頭報工。

由於CV實在太多,我都無時間逐一見面,最後人事部幫我shortlist咗兩位,兩個都係80後的後生女,一上到黎,我問佢地未來五年有咩願望,兩位都係答我「最想上車」。

我唔明,我真係唔明,目前香港呢個狀況,藍友斑真係聞所未聞,我都唔敢想像咁落去,呢個社會最後會變成點,中大校長沈祖堯話後生仔唔好因為500尺而失掉快樂,係我眼中,沈校長都已經太離地,或者佢應該調番轉去諗,其實對唔少後生仔而言,買到500尺,上到車,其實已經非常快樂。

*《斑駁陸離》逢星期二、四刊於《 香港投資日報

 

藍友斑 Bernard

Share On
Dislike
0

發表評論