係阿仙奴球迷心目中,有一位年輕球員係非常得竉,好多阿迷都會話呢個球員黎上流住阿仙奴既血,有阿仙奴DNA咁話,我諗係阿迷都估到我講邊個喇掛?為左方便啲唔係阿迷既朋友,我比多少少貼士,好多阿迷都話呢位球員假以時日會成為球隊隊長,係球隊未來希望……仲未知?着左靈魂既10號波衫,咁你知喇掛?

 

講到咁,又睇埋今次標題,我諗大家都估到我想講乜喇。無錯,就係韋舒亞。事情就係咁,話說好耐之前,韋舒亞一次喜愛夜蒲就比記者影到佢食煙,咁阿仙奴呢個大家庭,作為一個慈父角色既雲加(唔係慈母,我相信雲加係唔會拎碌棍毆啲球員),得知韋舒亞食煙梗係怒火中燒啦,曾經有英國小報就話佢極憤怒,但作為阿仙奴未來希望既韋舒亞,雲加就原諒左佢喇。

 

之但係,人類總是要犯重覆的錯,有埋前車之鑑都仲唔識驚。早兩日韋舒亞既女朋友係社交網站貼左張相,韋舒亞理所當然咁係張相到出現啦,但呢次真係大獲,張相居然影到佢拎住枝水煙既煙管!正所謂不怕神一樣的隊手,只怕豬一樣的女友,今次食水煙真係斷到正一正喇。

 

而家呢個真係風頭火勢,我相信大家都記得無幾耐之前,阿記正選門將仲係施捷施尼,點解佢會被打入冷宮,除左表現欠佳之外,英媒普遍都認為係因為佢有一次賽後係更衣室既淋浴間食煙被雲加捉到,就係咁先激到雲加要佢坐冷板櫈。

 

韋舒亞之前一直到養緊傷,佢對上一次出場比賽已經係上年11月阿記主場對曼聯既比賽,隔左差唔多三個月,雲加早排就話佢已經復操,但會唔會因為食水煙而無得出?咁就要睇下老人家點諗喇。

 

查實講起水煙,好多人都以為水煙比起普通香煙無咁危險,但事實並唔係咁,根據維基百科(唔係開台果個)資料,有研究話水煙對身體既損害同香煙其實差唔多,有啲產生既有害物質可能仲毒過香煙!

 

小妹都曾經試過踢街場既時候遇過一啲朋友,開波無耐由自己底線爆到落對方底線,再爆返返黎,但爆兩轉就好似哮喘發作咁,雖然咁爆真係好攰,但無理由頹得咁快喎,再踢一陣,果位朋友已經要換人出場邊,原來佢要食返枝煙黎充電!完場時我問佢:「乜食煙都踢到波架咩?」佢答我:「所以咪爆兩野就無氣囉!食煙真係好傷身架,想長踢長有,真係唔好食呀!」

 

韋舒亞身體狀況係點我就唔知,但我知對佢黎講吸煙危害職業生涯,至於你地諗到果四個字可以填乜,歡迎接龍。

Share On
Dislike
0

發表評論