法政匯思

維護法治精神、關心政制政事、匯集業界人士、廣傳進步思維。我們就是 《法政匯思》。

「你做乜 facebook 仲唔 add 我?!」

 

呢把女聲,我而家仲好記得。話晒都係香港一間有歷史、有規模嘅律師行,偏偏我呢位上司就最緊張我呢個 junior 點解仲未 add 佢,俾佢監視自己網上嘅一舉一動。

 

「呢排好忙,無時間玩 facebook 呀。」

 

真係好忙。記得嗰晚,趕完手頭上嘅工作就急急腳去出席立法會外聲援劉曉波嘅集會。係我衰,我忍唔住 upload 咗幾張相,set 咗公開。第二日返工,佢第一句已經問:

 

「又話無時間玩 facebook?咁得閒去埋啲乜乜乜集會,你係咪想好似嗰個陳淑 X 咁呀?」

 

梗係唔係啦。我不知幾想好似你咁,日日喺辦公時間上淘寶買鞋、研究放工去邊度 gel 甲、同一班秘書討論 TVB 最新嘅劇集,個個月頭飛日本、食好嘢、影 food porn 影 selfies,月尾發現自己唔夠 billable hours(律師按鐘收費的鐘數)就厚住面皮將下屬嘅 hours 過戶俾自己。對一個下屬係咁、兩個係咁,最後咪爆煲囉,一個部門六個律師喺六個月內紛紛辭職唔撈。朱咪咪話齋,做人最緊要有牙力,做律師梗要揀有實力,要得到下屬嘅尊重,無食力係唔得嘅。

 

雖然係咁,我都無諗住走。直至某年,我約咗幾個朋友去 7.1 遊行,但前一晚要通頂預備一單官司,最後去唔到遊行(當年嘅遊行比起而家仲算 a pretty big deal),只好無奈地喺自己 facebook 寫咗一句:

 

「人在公司,心在維園。」

 

咁就瀨咗嘢。話咁快,成個部門包括大老闆都知我「人在心不在」、「無心戀戰」、「心不在焉」。大佬呀,律師會都識話自己尊重「一國兩制」嘅原則啦,我喺 facebook 表達情感或政治理念係我個人嘅權利,佢又唔係我肚裡面條蟲,喺「未能掌握任何個案的第一手資訊的情況下」對個別事件作出評論,真不該。

 

行外男友話,聽到「女律師」三個字就會諗起兩個極端:「一係梁美芬、一係翁靜晶」。其實更恐怖嘅係呢種比港女仲要港女嘅政治冷感女上司。最後,當然遞信都遞唔切,因為我係真心樂意辭職,而唔係被免職㗎。

 

法政匯思facebook 專頁:https://www.facebook.com/proglawgroup

 

Share On
Dislike
0
法政匯思     律師     女律師生活

發表評論